Opna aftur fyrir umferð að gosstöðvunum á morgun

Elín Margrét Böðvarsdóttir skrifar 3. apríl 2021 10:03

Margir hafa lagt leið sína að eldgosinu í Geldingadölum á Reykjanesi undanfarna daga. Vísir/Vilhelm

Ákveðið hefur verið að opna aftur fyrir umferð um Suðurstrandarveg að gosstöðvum í Geldingadölum frá hádegi á morgun. Þetta kemur fram í tilkynningu frá Lögreglustjóranum á Suðurnesjum en gert er ráð fyrir að opnunin taki gildi klukkan tólf á morgun, páskadag.

Líkt og kunnugt er var ákveðið að loka fyrir umferð að gosstöðvunum í dag vegna veðurs. Rýming á svæðinu hófst um klukkan tíu í gærkvöldi og var lokið fyrir miðnætti.

„Vindátt fram að hádegi á morgun er okkur ekki hagstæð með tilliti til gasmengunar en mun verða betri um hádegi,“ segir í tilkynningunni.

„Veðurspá Veðurstofunnar gerir ráð fyrir norðan og norðaustan átt, frost 3 til 7 stig. Þeir sem hyggjast leggja leið sína að gosstöðvunum eftir hádegi á morgun ættu að huga vel að klæðnaði því að það verður kalt og vindkæling töluverð í ofanálag. Umferð sem nauðsynlega þarf að fara um Suðurstrandarveg mun geta farið fram hjá lokunum.“

Ráðlagt er fyrir þá sem hyggja á ferðalög um páskana að fylgjast vel með veðri og færð en gular viðvaranir eru til að mynda í gildi víða um land bæði í dag og á morgun.

Eldgos og jarðhræringar Eldgos í Fagradalsfjalli Veður Páskar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.