Innlent

Vel­ferðar­nefnd fundar með Svan­dísi vegna sótt­kvíar­hótela eftir helgi

Hallgerður Kolbrún E. Jónsdóttir skrifar
Helga Vala Helgadóttir, formaður Velferðarnefndar Alþingis, segir að nefndin muni funda eftir helgi vegna nýrrar reglugerðar um sóttkvíarhótel. Svandís Svavarsdóttir heilbrigðisráðherra hefur verið boðuð á fundinn. 
Helga Vala Helgadóttir, formaður Velferðarnefndar Alþingis, segir að nefndin muni funda eftir helgi vegna nýrrar reglugerðar um sóttkvíarhótel. Svandís Svavarsdóttir heilbrigðisráðherra hefur verið boðuð á fundinn.  Vísir/Vilhelm

Velferðarnefnd Alþingis mun koma saman eftir helgi til þess að ræða nýjar sóttvarnareglur á landamærum sem meðal annars fela í sér að ferðamenn frá ákveðnum löndum séu skikkaðir til að dvelja á sóttkvíarhótelum. Svandís Svavarsdóttir, heilbrigðisráðherra, hefur verið boðuð á fundinn.

Helga Vala Helgadóttir, formaður Velferðarnefndar, segir að tímasetning fundarins hafi ekki verið ákveðin en að stefnt sé á að hann verði haldinn eftir ríkisstjórnarfund á þriðjudag.

Þá hefur ekki verið ákveðið hvort fleiri verði kallaðir inn á fundinn en aðeins fjórðungur nefndarinnar þarf að sitja fund sem boðaður utan hefðbundins fundartíma sé ráðherra boðaður.

Hefur áhyggjur að lagastoð sé ekki til staðar

Deilt hefur verið um hvort lagastoð sé fyrir þeim aðgerðum sem gripið hefur verið til á landamærunum vegna komufarþega. Helga Vala segir í samtali við mbl.is að hún sé fylgjandi ráðstöfununum en að mikilvægt sé að sannreyna það að lagagrundvöllur sé fyrir aðgerðunum.

„Ég hef áhyggjur af því að ekki sé lagastoð fyrir þessu og þá erum við komin í vond mál. Það hefur enginn áhuga á því að skattfé almennings sé varið í endalausar bætur því að við getum ekki haft lagasetninguna í lagi,“ sagði Helga.

Breytingar á sóttvaralögum sem samþykktar voru á Alþingi í desember en ýmis ákvæði voru felld úr frumvarpinu vegna óeiningar um þau. Meðal annars voru þar heimildir til að setja á útgöngubann, skylda fólk í bólusetningar og til að halda sóttkví á tilteknum stað. Sóttvarnalæknir hefur þó heimild til að halda úti sóttvarnahúsum þar sem einstaklingar sem ekki eiga samastað hér á landi eða vilja ekki einangra sig í húsnæði á eigin vegum geta verið í sóttkví eða einangrun.

Helga Vala telur því hvergi hægt að finna heimild fyrir þessum aðgerðum í lagaákvæðinu.

„Það er hvergi í lagaákvæðinu að finna heimild til að skylda fólk í sóttkví í sóttvarnahúsi,“ sagði Helga.

„Með aðgerðum er ferðamaður sviptur grundvallarmannréttindum“

Helga Vala er ekki sú eina sem hefur lýst yfir áhyggjum vegna þessara aðgerða á landamærum. Halldóra Mogensen, þingflokksformaður Pírata, sagði í dag að óvíst sé að ný reglugerð um sóttkvíarhótel standist lög og kallaði hún eftir því að Velferðarnefnd Alþingis kæmi saman um páskana til að útkljá málið. Það gekk ekki eftir.

Þá kallaði Hanna Katrín Friðriksson, þingflokksformaður Viðreisnar, einnig eftir því að nefndin kæmi saman svo hægt væri að fá botn í málið. Hún sagðist telja aðgerðirnar of mikið inngrip í frelsi fólks sem hafi í önnur hús en farsóttarhús að vernda hér á landi.

Lögmenn hafa einnig vakið athygli á málinu, til að mynda lögmannsstofan Vivos lögmenn, sem vakti athygli á málinu í dag.

Aðili á ferð milli landa sjálfkrafa frelsissviptur á Íslandi Með aðgerðum stjórnvalda að skylda ferðamann á ferð milli...

Posted by Vivos Lögmenn on Friday, April 2, 2021

„Með aðgerðum stjórnvalda að skylda ferðamann á ferð milli landa í einangrun í sóttvarnarhúsi, er ferðamaður sviptur grundvallarmannréttindum auk þess að þurfa að greiða fyrir það kr. 50.000. Skv. sóttvarnalögum nr. 19/1997 getur sóttvarnalæknir sett einstakling í einangrun. Fari sú ákvörðun gegn vilja hins smitaða getur hann borið hana undir dómstóla. Dómara bera að taka málið fyrir tafarlaust,“ skrifa Vivos Lögmenn í Facebook-færslu í dag.


Tengdar fréttir

Neitar að funda með velferðarnefnd: „Við verðum bara að halda þetta út“

Guðmundur Ingi Kristinsson, þingflokksformaður Flokks fólksins, hyggst ekki samþykkja að velferðarnefnd Alþings komi saman í páskafríi til þess að ræða um lögmæti reglugerðar um sóttkvíarhótel, líkt og kallað hefur verið eftir. Samþykki allra fulltrúa velferðarnefndar þarf til þess að af fundinum verði.

Langflestir virðast hafa afbókað ferðina til Íslands

Hundrað og tuttugu manns dvöldu í sóttkvíarhótelinu við Þórunnartún í nótt. Útlit er fyrir að langflestir hafi afbókað ferð sína til landsins því viðbúið var að ríflega sex hundruð manns yrðu þar í nótt.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.