Segir fjöl­marga telja mynd­bandið vera falsað

Eftir að níu manna hópurinn var kominn að svæðinu á laugardagsmorgun kom raunar í ljós að tveir boltar voru með í för. Úr varð ótrúlegt myndband sem náð hefur mikilli útbreiðslu á heimsvísu á skömmum tíma. Hefur Thelma varla undan að svara fyrirspurnum erlendra fjölmiðla og annarra áhugasamra.

Framlag í Instagramkeppni

Þegar þetta er skrifað hefur verið horft 3,8 milljón sinnum á myndbandið sem Rut Einarsdóttir birti af blakleiknum á Twitter og fer sú tala hratt vaxandi. 

Þar að auki hefur myndband hennar og annað sem ferðafélagar Thelmu tóku upp verið endurbirt víða, meðal annars af fréttaveitunni Reuters, morgunþættinum Today á bandarísku NBC-sjónvarpsstöðinni og fjölmörgum öðrum miðlum. Þá hefur bandaríska íþróttastöðin ESPN, ein stærsta sinnar tegundar í heiminum, óskað eftir að fá að birta myndbandið á sínum miðlum.

Myndbandið sem Rut tók má sjá hér fyrir neðan en það hefur náð miklum vinsældum á Twitter.

Thelma segir að hún hafi aldrei getað gert sér í hugarlund hversu mikla athygli blakleikur þeirra fengi. Hann var upphaflega hugsaður sem framlag í myndbandskeppni sem eitt stærsta strandblaklið Noregs stendur fyrir á Instagram.

Margir telja myndbandið falsað

„Ég er eiginlega búin að vera í sjokki í tvo daga,“ segir hún í samtali við Vísi. Á myndbandinu má sömuleiðis sjá landsliðsmennina Sigþór Helgason og Kára Hlynsson auk Borja Gonzales, þjálfara íslenska kvennalandsliðsins í blaki. Sá síðastnefndi hafði þá fengið sömu myndbandshugmynd og mætt með sinn bolta en hópurinn ákvað að sameina krafta sína.

Óhætt er að segja að framlag þeirra fái háa einkunn fyrir frumleika en það telst svo ótrúlegt að margir netverjar eru staðráðnir í að brögð séu í tafli.

Það halda rosalega margir að þetta myndband sé falsað og sumir sagt að þetta sé green screen eða eitthvað svoleiðis. Þá er fínt að hafa tvö myndbönd til að bakka hvort annað upp.“

Thelma segir að margir hafi heillast af myndbandinu á samfélagsmiðlum og lýst yfir áhuga á því að koma til landsins og sjá gosið. Þó beri einnig á því að fólk gagnrýni athæfið og telji hópinn fara óvarlega.

„Ég er alveg búin að vera að passa mig svolítið að vera ekkert að lesa allt, það er rosalega mikið af fólki sem segir að við séum hauslaus og gætum dottið ofan í hraunið hvenær sem er,“ segir Thelma létt í bragði.

„Það sést í rauninni ekki í myndbandinu hvað það er stór brekka fyrir neðan okkur svo við erum fjær frá hrauninu en það lítur út fyrir. Það er mjög mikið af fólki búið að senda skilaboð og líka sumir sem skilja ekki hvers vegna við erum í lopapeysu, hvers vegna við erum svona vel klædd við eldgos, það geti ekki verið svona kalt hjá eldgosi og þetta geti því ekki verið satt.“

Tilviljun að hún varð vitni af athæfinu

Rut Einarsdóttir segir það hafa komið sér virkilega á óvart hversu mikið áhorf litla myndskeiðið hennar hafi fengið en fyrirspurnum frá erlendum miðlum og efnisveitum hefur rignt yfir hana síðustu sólarhringa.

Hún og vinkona hennar Árdís Drífa Birgisdóttir lögðu af stað að eldstöðvunum klukkan fjögur á laugardagsmorgun og sáu blakspilarana þegar þær voru á leiðinni til baka.

Telma hafði ekki hugmynd um að Rut hafi tekið gjörninginn upp á sínum tíma en hafa þær síðan þá átt í samskiptum og verið samstíga í því hvernig dreifingunni er háttað. Dæmi eru um að fyrirtæki hafi óskað eftir að fá einkarétt á dreifingu myndskeiðanna gegn greiðslu en Rut og Thelma hafa frekar kosið að dreifa gleðinni sem víðast.

Mjög margir vinir mínir út í heimi hafa verið að senda mér greinar sem ég hafði ekki hugmynd um. Þetta virðist fara mjög víða,“ segir Rut.

Hefur meðal annars verið fjallað um myndbandið í suður-amerískum, spænskum, þýskum, makedónskum og tyrkneskum miðlum. Hún segir viðbrögðin við myndbandinu að mestu verið jákvæð og efast ekki um að hér sé á ferðinni fínasta landkynning.

Ætla að reyna fyrir sér í strandblaki í sumar

Thelma er ekki síður stolt af því að örfrægð hópsins beini sviðsljósinu að íþróttinni sem henni er kær en hún telur að fæstir Íslendingar geri sér grein fyrir því hvað blak er umfangsmikil íþróttagrein.

Auk þess að vera í landsliðshópnum spilar hin 23 ára Thelma með Aftureldingu. Hún hefur áður spilað sem atvinnumaður erlendis og segir það færast í aukanna að íslenskt afreksfólk í blaki fari þá leið.

Í sumar stefnir hún á að skipta um kúrs og reyna fyrir sér í strandblaki á Ítalíu ásamt vinkonu sinni Jónu Guðlaugu Vigfúsdóttur samhliða landsliðsverkefnum. Jóna hefur undanfarin ár verið í atvinnumennsku í Svíþjóð.

Telur Thelma að myndböndin frægu eigi eftir að hjálpa til við að vekja athygli á þeim erlendis.

Það hefur fullt af fólki sett sig í samband og maður er eiginlega sífellt í sjokki yfir því hverjir eru búnir að því. Í sjálfu sér var ég bara að spila blak og þetta var ekkert öðruvísi fyrir mig. Ég geri mér kannski ekki alveg grein fyrir því hvað þetta er orðið stórt.“