Innlent

Leikskólabörnin smituðust heima en ekki á leikskólanum

Sunna Kristín Hilmarsdóttir skrifar
Þórólfur Guðnason, sóttvarnalæknir, með grímu á blaðamannafundi ríkisstjórnarinnar í liðinni viku um hertar sóttvarnaaðgerðir.
Þórólfur Guðnason, sóttvarnalæknir, með grímu á blaðamannafundi ríkisstjórnarinnar í liðinni viku um hertar sóttvarnaaðgerðir. Vísir/Vilhelm

Þau tvö börn á leikskólaaldri sem eru með kórónuveiruna greindust ekki á leikskólum sínum heldur heima með fjölskyldunum sínum.

Þetta kom fram í máli Þórólfs Guðnasonar, sóttvarnalæknis, í Morgunútvarpinu á Rás 2 í morgun en í uppfærðum tölum á covid.is í gær kom fram að tvö börn á aldrinum eins til fimm ára væru smituð af veirunni.

Sú tala er óbreytt eftir að tölur dagsins bárust en alls greindust tíu innanlands í gær. Þar af var einn utan sóttkvíar, allir hinir níu voru í sóttkví.

„Þetta eru ekki smit á leikskólum heldur eru þetta tvö börn á leikskólaaldri sem smituðust heima af fjölskyldum sínum, en ekki á leikskólanum,“ sagði Þórólfur.

Hann sagði smit barnanna tengjast smitum sem komu upp í grunnskóla á höfuðborgarsvæðinu í liðinni viku sem teygt hefur anga sína víða. Fjöldi barna í Laugarnesskóla greindist með kórónuveiruna og hafa til dæmis nemendur í Víðistaðaskóla og Öldutúnsskóla smitast út frá þeirri hópsýkingu.

Þórólfur benti á að margir hefðu þurft að fara í sóttkví síðustu daga.

„Og margir smitast. Við svona nána útsetningu eins og er á heimilum þá getur það náttúrulega gerst. Börn á leikskólaaldri geta smitast en það er miklu sjaldgæfara og ég held það sé vert að hafa í huga að þetta eru ekki smit á leikskólum heldur eru þetta smit hjá tveimur leikskólabörnum sem urðu heima hjá fjölskyldunni,“ sagði Þórólfur.

Samkvæmt covid.is eru nú 32 börn í einangrun með Covid-19, flest á aldrinum sex til tólf ára eða alls 21.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.