Erlent

Rann­saka aðild starfs­manna­stjóra Trump að þrýstings­her­ferð í Georgíu

Kjartan Kjartansson skrifar
Mark Meadows, fyrrverandi starfsmannastjóri Hvíta hússins, á kveðjuathöfn þegar Trump lét af embætti 20. janúar. Þeir beittu flokkssystkini sín í Georgíu miklum þrýstingi til að reyna að snúa við úrslitum kosninganna þar.
Mark Meadows, fyrrverandi starfsmannastjóri Hvíta hússins, á kveðjuathöfn þegar Trump lét af embætti 20. janúar. Þeir beittu flokkssystkini sín í Georgíu miklum þrýstingi til að reyna að snúa við úrslitum kosninganna þar. Vísir/EPA

Athafnir Marks Meadow, fyrrverandi starfsmannastjóra Hvíta hússins, í þrýstingsherferð Donalds Trump, þáverandi Bandaríkjaforseta, til að breyta kosningaúrslitum í Georgíu eru líklegar til að vekja athygli umdæmissaksóknara sem rannsakar hvort að Trump hafi brotið lög með afskiptum sínum af kosningunum.

Joe Biden varð fyrsti frambjóðandi demókrata til að hrósa sigri í forsetakosningum í Georgíu í 28 ár í nóvember. Georgía varð í kjölfarið einn af miðpunktum stoðlausara samsæriskenninga Trump og bandamanna hans um að hann hefði verið hlunnfarinn með stórfelldum kosningasvikum.

Trump reyndi um margra vikna skeið að þrýsta á ráðamenn í Georgíu um að snúa úrslitum kosninganna við þrátt fyrir að tvær endurtalningar hefðu staðfest úrslitin. Í því skyni hringdi Trump í innanríkisráðherra Georgíu og æðsta yfirmann kosningamála ríkisins og sagði honum að „finna“ nægileg mörg atkvæði til að færa honum sigurinn.

Reuters-fréttastofan segir að hlutur Meadows í þrýstingsherferð Trump sé líklegur til að koma til kasta umdæmissaksóknara í Fulton-sýslu í Georgíu sem rannsakar nú hvort forsetinn fyrrverandi hafi brotið lög.

Mætti óvænt í heimsókn til kjörstjórnar

Daginn eftir að Trump kvartaði opinberlega undan því að endurtalning í Georgíu gengi of hægt og að svik hefðu fengið að grassera mætti Meadows í óvænta heimsókn í úthverfi Atlanta og vildi fá að fylgjast með endurskoðun á undirskriftum þúsundum kjósenda. Innanríkisráðherra Georgíu fékk aðeins vitneskju um komu Meadows 45 mínútum áður en hann mætti á staðinn 22. desember.

Meadows var ekki leyft að fara inn í herbergið þar sem starfsmenn kjörsóknar skoðuðu hvort undirskriftir kjósenda sem höfðu greitt atkvæði utan kjörfundar pössuðu við sýnishorn í skrám kjörstjórnar.

Þáverandi starfsmannastjóri Hvíta hússins nýtti tímann og safnaði símanúmerum embættismanna sem Trump hringdi svo í til að fá þá til að hagræða úrslitum kosninganna sér í vil.

Mesta athygli vakti símtal Trump til Brads Raffensperger, innanríkisráðherra, 2. janúar. Hvíta húsið hafði reynt að hringja í Raffensperger átján sinnum fyrir það en innanríkisráðherrann sagðist hafa forðast að taka símann þar sem það gæti leitt til hagsmunaáreksturs fyrir hann.

Upptaka af símtalinu rataði í hendur bandarískra fjölmiðla. Á henni heyrðist Trump segja Raffensperger, sem er repúblikani, að það væri ekkert athugavert við að hann gæfi út ný kosningaúrslit og segðist hafa misreiknað sig.

Vildi trúnaðarupplýsingar um kjósendur

Meadows tók þátt í símtalinu. Í því krafði hann embættismenn í Georgíu um upplýsingar um kjósendur sem eru bundnar trúnaði. Kröfu Meadows var hafnað í samræmi við ríkislög en starfsmannastjórinn lét ekki segjast og bað lögfræðing innanríkisráðherrans um að ræða við fulltrúa Hvíta hússins um aðgang að gögnunum.

Símtalið varð kveikjan að rannsókn Fani Willis, umdæmissaksóknarans í Fulton-sýslu sem Atlanta-borg tilheyrir. Willis er demókrati.

Lögspekingar telja að Meadows gæti hafa framið lögbrot með því reyna að fá innanríkisráðherrann til að brjóta gegn skyldu sinni um að vernda trúnað um persónuupplýsingar kjósenda.

Hringdi beint í rannsakanda innanríkisráðherrans

Nýlega birti Wall Street Journal upptöku af öðru símtali Trump og embættismanns í Georgíu, nú við Frances Watson, aðalrannsakanda innanríkisráðherrans. Reuters-fréttastofan segir að Meadows hafi rætt við Watson í heimsókn sinni í desember og fengið farsímanúmer hennar.

Daginn eftir hringdi Trump persónulega í Watson og hvatti hana til að finna „óheiðarleikann“ sem átti að hafa kostað hann kosningasigurinn.

„Þegar réttu svörin koma í ljós verður þú lofuð,“ heyrist Trump segja á upptökunni af símtalinu.


Tengdar fréttir

Trump bað kosninga­eftir­lits­mann í Georgíu að „finna svindlið“

Donald Trump, fráfarandi Bandaríkjaforseti, hvatti kosningaeftirlitsmann í Georgíu til þess að „finna svindlið“ og sagði að hann yrði þjóðhetja ef það tækist. Þetta er þriðja skiptið sem því er lýst að Trump hafi hringt í háttsetta embættismenn í Georgíu í von um að þeir myndu snúa niðurstöðum kosninganna.

Tóku Trump upp ef hann segði ósatt frá, sem hann svo gerði

Brad Raffensperger, innanríkisráðherra Georgíu, og starfsmenn hans ákváðu að taka upp umdeilt símtal þeirra við Donald Trump, forseta Bandaríkjanna, og starfsmenn hans meðal annars vegna þess hve frjálslega forsetinn hefur farið með sannleikann.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.