Innlent

Ríkið viðurkennir brot á mannréttindum og greiðir milljónir í bætur

Hólmfríður Gísladóttir skrifar
Sigurjón Árnason, fyrrverandi bankastjóri Landsbankans, og Karl Wernersson, fjárfestir og einn eigenda Milestone.
Sigurjón Árnason, fyrrverandi bankastjóri Landsbankans, og Karl Wernersson, fjárfestir og einn eigenda Milestone.

Íslenska ríkið viðurkennir að fimm Íslendingar hafi ekki fengið réttláta málsmeðferð hér á landi varðandi dóma sem þeir fengu í kjölfar hrunsins. Ríkið greiðir bætur í málinu og hefur Mannréttindadómstóll Evrópu því fellt niður málin.

Úrskurðir í málunum voru á dagskrá MDE í dag en í tilkynningu frá dómstólnum kemur fram að sátt hafi náðst í málinu.

Samkvæmt fréttatilkynningunni mun íslenska ríkið greiða Sigurjóni Þorvaldi Árnasyni, Ívari Guðjónssyni, Sigurþóri Charles Guðmundssyni, Margréti Guðjónsdóttur og Karli Emil Wernerssyni 1,8 milljónir króna í bætur.

Í máli Sigurjóns er vísað til úrskurðar MDE í máli Sigríðar Elínar Sigfúsdóttur en í málum hinna til úrskurðar dómstólsins í máli Styrmis Þórs Bragasonar, þar sem niðurstaðan var sú að Hæstiréttur hefði snúið sýknudómi héraðsdóms án þess að hlýða á vitnisburði.

Sáttirnar gera ráð fyrir því að einstaklingarnir geti farið fram á endurupptöku mála sinna.

Deilt um fjárhagslega hagsmuni dómara

Sigurjón og Ívar voru báðir sakfelldir í svokölluðu markaðsmisnotkunarmáli Landsbankans. Dómar beggja voru þyngdir í Hæstarétti; Sigurjón, sem var bankastjóri Landsbankans fyrir hrun, var dæmdur í 18 mánaða fangelsi og Ívar, þáverandi forstöðumaður eigin fjárfestinga bankans, í tveggja ára fangelsi.

Kvartanir beggja til MDE grundvölluðust á því að dómarar sem dæmdu í Hæstaréttarmálinu hefðu átt fjárhagslegra hagsmuna að gæta, þeir Eiríkur Tómasson, Markús Sigurbjörnsson og Viðar Már Matthíasson.

Mannréttindadómstóll Evrópu.

Mannréttindadómstóllinn hefur áður dæmt í afar áþekku máli, þegar hann komst að þeirri niðurstöðu að Sigríður Elín Sigfúsdóttir, fyrrverandi framkvæmdastjóri fyrirtækjasviðs Landsbankans, hefði ekki fengið réttláta málsmeðferð þar sem Viðar hefði tapað 8,5 milljónum króna við fall bankans.

Sigríður Elín var dæmd í svokölluðu Ímon-máli, þar sem Sigurjón hlaut einnig dóm.

Þegar MDE tók mál Sigríðar Elínar fyrir var einnig fjallað um fjárhagslega hagsmuni Eiríks og Markúsar. Þeir voru hins vegar ekki metnir nógu verulegir til að það hefði áhrif á hæfi þeirra. Eign Eiríks í Landsbankanum hefði verið óveruleg og Markús átt hlut í öðrum banka, Glitni.

Sýknuð í héraði en sakfelld í Hæstarétti

Karl Emil, Margrét og Sigurþór hlutu öll dóma í Milestone-málinu. Þau voru sýknuð í héraðsdómi en Hæstiréttur sakfelldi þau og dæmdi í fangelsi. Karl var einn aðaleigenda Milestone en Margrét og Sigurþór endurskoðendur hjá KPMG.

Karli var í Milestone-málinu gefið að sök að hafa misnotað aðstöðu sína og valdið félaginu verulegu fjárhagstjóni með því að láta það fjármagna efndir á samningum sem voru Milestone óviðkomandi en um var að ræða greiðslur til Ingunnar Wernersdóttur, systur Karls.

Þá voru Margrét og Sigurþór sögð hafa gerst sek um stórfellda vanrækslu í starfi við endurskoðun ársreikninga Milestone árin 2006 og 2007.

Kvörtun þremenningana til MDE byggði meðal annars á þeim rökum að Hæstiréttur hafi ekki hlýtt á vitnisburð sakborninga og vitna, heldur endurmetið það sem fram kom við meðferð málsins fyrir héraðsdómi.

Þá gerði Karl athugasemd við hlutabréfaeign fjöggurra dómara við réttinn, þeirra Gretu Baldursdóttur, Markúsar Sigurbjörnssonar, Ólafs Barkar Þorvaldssonar og Viðars Más Matthíassonar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.