Heimsmarkmiðin

„Það bjargar enginn heiminum einn“

Heimsljós
Úr fyrsta þættinum sem sýndur var á föstudaginn.
Úr fyrsta þættinum sem sýndur var á föstudaginn.

Ungir þáttastjórnendur kynna sér heimsmarkmið Sameinuðu þjóðanna um sjálfbæra þróun í nýrri þáttaröð á KrakkaRÚV, HM30,  sem framleidd í samstarfi við forsætis- og utanríkisráðuneytið.

„Það sem kom mér mest á óvart þegar ég var að kynna mér heimsmarkmiðin var til dæmis hversu mikið vatn þarf til að búa til einn hamborgara, hversu mörg ár börn í sumum löndum fá að vera í skóla, ójafnrétti á milli karla og kvenna á vinnumarkaðnum. Og svona gæti ég haldið áfram,” segir Steinunn Kristín Valtýsdóttir eða Dídí eins og hún er jafnan kölluð. Hún sér ásamt Aroni Gauta Kristinssyni um nýja þáttaröð á KrakkaRÚV um heimsmarkmið Sameinuðu þjóðanna um sjálfbæra þróun.

Þættirnir hafa hlotið nafnið HM30 og verða sýndir á föstudögum næstu mánuðina. KrakkaRÚV framleiðir þættina í samstarfi við forsætis- og utanríkisráðuneytið og undirbúningsvinna við þættina hefur staðið yfir í nokkra mánuði.

Í fyrsta þættinum sem sýndur á föstudag kynntu Dídí og Aron sér markmið númer 17 - samvinnu um markmiðin og ræddu við Katrínu Jakobsdóttur forsætisráðherra. Að mati Arons er sautjánda markmiðið það mikilvægasta. „Það er það sem þarf að vera í lagi til að við getum unnið að hinum markmiðunum. Það bjargar enginn heiminum einn. Við þurfum samvinnu og samstöðu. Þetta snýst um það að búa til sanngjarnari, jafnari, hreinni og betri heim fyrir alla sem búa hérna á jörðinni og hvað við, ég og þú, getum gert,” segir Aron.

Á skólavef Félags Sameinuðu þjóðanna er að finna ýmis konar kennslugögn tengd heimsmarkmiðunum. Um er að ræða verkefnahugmyndir sem nýtast kennurum á grunn- og framhaldsskólastigi en markmiðið er að nemendur öðlist aukinn skilning á alþjóðamálum og sjálfbærri þróun og þjálfist í gagnrýnni hugsun. Þá hefur Menntamálastofnun einnig gefið út námsefni þar sem heimsmarkmiðin koma fyrir.

Handritshöfundar að HM30 eru Birkir Blær Ingólfsson, Eva Rún Þorgeirsdóttir, Jóhannes Ólafsson og Sigyn Blöndal, sem jafnframt er leikstjórin. Upptaka og samsetning er í höndum Sturlu Skúlasonar Holm. Þættirnir eru sýndir í þættinum Húllumhæ á föstudögum kl. 18.35. Jafnframt birtast þeir á vef Heimsmarkmiðanna á hverjum föstudegi, auk stoðefnis sem Félag Sameinuðu þjóðanna hefur látið þýða á íslensku.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.



×