Innlent

Ákærður fyrir kynferðislega áreitni og brot gegn börnum í Austurbæjarskóla

Kolbeinn Tumi Daðason skrifar
Austurbæjarskóli fagnaði níutíu ára afmæli í fyrra.
Austurbæjarskóli fagnaði níutíu ára afmæli í fyrra. Vísir/Vilhelm

Karlmaður hefur verið ákærður fyrir kynferðislega áreitni og brot gegn barnaverndarlögum með því að hafa mánudaginn 2. september 2019 farið í heimildarleysi inn í Austurbæjarskóla í Reykjavík og brotið gegn þremur nemendum skólans. Málið var þingfest við Héraðsdóm Reykjavíkur eftir hádegið í dag. Þinghald í málinu er lokað.

Karlmaðurinn er í fyrsta lagi ákærður fyrir að lokka níu ára stúlku upp á rishæð skólans þar sem hann kleip hana í rassinn og strauk læri hennar og kynfæri utanklæða. Í öðru lagi fyrir að hafa slegið fjórtán ára dreng á rassinn. 

Í þriðja lagi fyrir að hafa sest á bekk við hlið fimmtán ára stúlku sem þar sat og fært sig nær henni þegar hún reyndi að komast undan. Er honum gefið að sök að hafa svo sett hönd á annað læri stúlkunnar og elta hana þegar hún stóð upp þar til hún fór til hóps af drengjum.

Móðir níu ára stúlkunnar gerir kröfu um 800 þúsund krónur í miskabætur vegna ólögráða dóttur sinnar.

Á þrítugsaldri þegar brotið var framið

Fjallað var um málið í fjölmiðlum í september 2019. Þá kom fram að karlmaðurinn væri á þrítugsaldri og hann hefði fundist nokkrum dögum eftir verknaðinn. Tekin var skýrsla af honum en ekki þótti tilefni til að fara fram á gæsluvarðhald.

Ísold Ingvarsdóttir, móðir níu ára stúlkunnar, sagði í viðtali við Morgunblaðið á sínum tíma að fyrstu dagarnir eftir atvikið hefðu verið rosalega erfiðir.

„Hún fékk martraðir hverja einustu nótt þar sem hana dreymdi að einhver eða eitthvað væri að elta hana. Hún var alltaf að spyrja hvort það væri búið að finna manninn og þegar ég sagði henni að hann væri fundinn létti henni alveg óskaplega. Hún fékk alla þá aðstoð sem hún þurfti og það var mjög vel haldið utan um hana bæði í skólanum og hjá Barnavernd.“

Fegin að dóttirin fraus ekki

Hún hefði sem foreldri fengið einhvers konar áfall.

„Ég varð ofboðslega reið, eiginlega meira gagnvart skólanum en manninum, því ég lít á hann sem mann sem þarf verulega mikla hjálp. Ég varð reið við skólann því ég hélt að barnið mitt væri öruggt þar. Ég get ekki hugsað þá hugsun til enda hvað hefði getað gerst ef dóttir mín hefði frosið og ekki getað hreyft sig, eins og mér skilst að séu algeng viðbrögð í svona aðstæðum. Það vona auðvitað allir að barnið þeirra muni ekki upplifa neitt svona, en þetta eru aðstæður sem öll börn geta lent í.“

Skóla- og frístundasvið sagðist í framhaldi af málinu ætla að ræða við alla skólastjóra í grunnskólum borgarinnar og skoða hvort að herða þurfi aðgangsstýringu í skólunum.


Tengdar fréttir

Töldu ekki tilefni til gæsluvarðhalds yfir manninum í Austurbæjarskóla

Ekki þótti tilefni til þess að fara fram á gæsluvarðhald yfir karlmanni á þrítugsaldri sem grunaður er um að hafa farið inn í Austurbæjarskóla á miðjum skóladegi í upphafi þessa mánaðar, platað stúlku í fimmta bekk upp á aðra hæð skólans, þar sem hann þuklaði á henni og hafði uppi kynferðislega tilburði.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.