Erlent

Seg­ir sam­sær­is­kenn­ing­ar vera krabb­a­mein Rep­úbl­ik­an­a­flokks­ins

Samúel Karl Ólason skrifar
Mitch McConnell og Marjorie Taylor Greene.
Mitch McConnell og Marjorie Taylor Greene. Vísir/AP/GETTY

Mitch McConnell, leiðtogi Repúblikana í öldungadeild Bandaríkjaþings, segir hina umdeildu þingkonu Marjorie Taylor Greene ekki lifa í raunveruleikanum og að hugmyndafræði hennar sé krabbamein fyrir flokkinn og Bandaríkin. Þetta sagði McConnell í yfirlýsingu í gærkvöldi.

Hann nefndi Taylor Greene ekki á nafn en hvern hann er að tala um er öllum ljóst. Þeirra á meðal henni, en þingkonan frá Georgíu svaraði McConnell á Twitter.

„Klikkaðar lygar og samsæriskenningar eru krabbamein fyrir Repúblikanaflokkinn og ríki okkar,“ sagði McConnell í yfirlýsingu til The Hill.

„Einhver sem heldur kannski að engar flugvélar hafi lent á Pentagon, að skotárásir í skólum séu tilbúningur og að Clinton fjölskyldan hafi brotlent flugvél JFK yngri, býr ekki í raunveruleikanum. Þetta hefur ekkert með vandræði bandarískra fjölskylda að ræða eða þá málefnalegu umræðu sem getur styrkt flokk okkar.“

Fjölmiðlar vestanhafs hafa verið að grafa upp fjölmörg umdeild mál Taylor Greene á undanförnum dögum og vikum. Þar á meðal eru myndbönd þar sem hún heldur því fram að skotárásirnar í Las Vegas, þar sem 58 dóu og um 900 særðust og slösuðust, og Parkland hafi verið verið sviðsettar. Einnig hafa fundist rasísk ummæli.

Einnig hafa fundist færslur eftir hana á netinu þar sem hún hefur kallað eftir því að leiðtogar Demókrataflokksins og útsendarar alríkisstofnanna verði teknir af lífi.

Áreitti ungmenni eftir skotárás

Þá hefur myndband af þingkonunni verið í dreifingu, sem tekið var upp nokkrum vikum eftir árásina í Parkland, þar sem sautján nemendur og kennarar í Stoneman Douglas skólanum voru skotnir til bana. Á þessu myndbandi sést Taylor Greene elta og áreita einn nemenda skólans sem var þá ekki orðinn átján ára gamall.

Taylor Greene elti hann, kallaði hann lygara, leikara og heigul. Hún tjáði drengnum, sem heitir David Hogg, einnnig að hún væri vopnuð.

Fred Guttenberg, faðir stúlku sem var skotin til bana í skólanum, dreifði meðal annars myndbandinu sem var upprunalega birt á Youtube síðu Taylor Greene.

Taylor Greene, sem er yfirlýstur stuðningsmaður Qanon samsærishreyfingarinnar, svaraði McConnell á Twitter í gær. Þar sagði hún hið raunverulega krabbamein í Repúblikanaflokknum vera veikgeðja Repúblikana sem kunni ekkert annað en að tapa með reisn.

„Þess vegna erum við að tapa landinu okkar,“ skrifaði hún.

Í annarri yfirlýsingu til CNN í gærkvöldi, kom McConnell þingkonunni Liz Cheney til varnar. Hún er þriðji æðsti þingmaður flokksins og hefur átt undir högg að sækja eftir að hún og níu aðrir Repúblikanar í fulltrúadeildinni greiddu atkvæði með því að ákæra Donald Trump, fyrrverandi forseta, fyrir embættisbrot.

Bandamenn Trumps hafa gengið hart fram gegn Cheney síðan þá og jafnvel krafist þess að henni verði vikið úr flokknum.

McConnell sagði hana hins vegar hafa sýnt hugrekki og að hún hefði fylgt sannfæringu sinni. Hann sagði Cheney vera mikilvægan leiðtoga, bæði fyrir Repúblikana og Bandaríkin.

„Ég er þakklátur henni fyrir þjónustu hennar og hlakka til að halda áfram að vinna með henni að þeim mikilvægu málefnum sem þjóð okkar stendur frammi fyrir,“ sagði McConnell.

Saman þykja þessar yfirlýsingar til marks um það að McConnell sé þeirrar skoðunar að flokknum sé nauðsynlegt að halda hefðbundnum Repúblikönum eins og Cheney og setja öfgamenn eins og Taylor Greene á hliðarlínuna, eins og það er orðað í frétt Washington Post.

Fulltrúadeildarþingmenn Repúblikanaflokksins munu halda símafund á morgun þar sem fastlega er búist við því að málefni beggja kvenna verði rædd innan þingflokksins.

Taylor Greene fékk nýverið sæti í Mennta- og atvinnumálanefnd fulltrúadeildarinnar og hafa Demókratar krafist þess að henni verði vikið úr nefndinni. Þeir hafa einnig kallað eftir því að henni verði vikið af þingi, sem nokkrir Repúblikanar hafa einnig gert.

Jimmy Gomez, þingmaður Demókrataflokksins, hefur sagt að verði Taylor Greene ekki vikið af þingi af Repúblikönum, muni hann leggja fram frumvarp þar að lútandi.

Til stendur að hún ræði við Kevin McCarthy, leiðtoga Repúblikanaflokksins í fulltrúadeildinni, í dag.


Tengdar fréttir

Trump situr á digrum sjóðum

Donald Trump, fyrrverandi forseti Bandaríkjanna, safnaði 31,5 milljónum dala (rétt rúmum fjórum milljörðum króna) í sérstakan stjórnmálasjóð á vikunum eftir forsetakosningarnar sem hann tapaði í nóvember.

Afar hæpið að Trump verði sakfelldur

Ólíklegt er að öldungadeild bandaríska þingsins sakfelli Donald Trump, fyrrverandi forseta, fyrir embættisbrot. Langflestir Repúblikanar greiddu atkvæði með frávísunartillögu í gærkvöldi.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×