Aukinn fjöldi greinist með kynsjúkdóma

Landlæknir telur ástæðu til að vekja athygli á auknum fjölda þeirra sem greinst hafa á undanförnum árum með kynsjúkdóma, einkum sárasótt og lekanda. Vakin hefur verið athygli á því af embættinu að það kunni að hafa verið slakað á notkun smokka við kynmök eftir að öflug meðferð við HIV-sýkingu kom fram.

Sóttvarnalæknir telur mikilvægt að vekja athygli á þessari þróun, einkum meðal þeirra sem teljast til áhættuhópa.

Það sem af er ári hafa greinst jafn mörg tilfelli af sárasótt hér á landi og allt árið 2015. Er það mat sóttvarnalæknis að það staðfesti aukningu á sjúkdómnum á undanförnum þremur árum.

Árið 2014 greindust sautján tilfelli af sárasótt og árið 2015 greindust 24 tilfelli. Af þeim sem greinast með sjúkdóminn eru 90% karlmenn en flestir þeirra sem sýktust voru karlar sem stunda kynlíf með öðrum körlum. Af þeim sem sýktust voru flestir á aldrinum 30 til 39 ára.

Á undanförnum þremur árum hefur einstaklingum sem greinst hafa með lekanda fjölgað jafnt og þétt. Á árinu 2014 greindust 38 einstaklingar, árið 2015 voru þeir 46 og það sem af er árinu 2016 hafa 68 greinst með lekanda.

Flestir eru í aldurshópnum 20 til 29 ára og eru 77 prósent þeirra karlmenn. Smit tengist samkynhneigð í yfir 70 prósent tilfella það sem af er árinu 2016. Enn sem komið er tengist lekandi hér á landi ekki sýklalyfjaónæmi en víða erlendis er það vaxandi vandamál.

Mánaðarlegur fjöldi þeirra sem greinst hefur með klamydíusmit á þessu ári er svipaður og á árinu 2015. Vorið 2016 greindust óvenju margir einstaklingar með HIV-sýkingu sem náði hámarki í apríl síðastliðnum. Það sem af er árinu 2016 hafa fleiri greinst með HIV-sýkingu en allt árið 2015.