Morientes ekki á leið til Spánar

Umboðsmaður spænska framherjans Fernando Morientes hjá Liverpool segir ekkert til í orðrómi sem verið hefur á kreiki um að Morientes sé á leið aftur til heimalands síns. Hann hefur verið orðaður við Valencia og Real Betis, en hann á tvö ár eftir af samningi sínum við Liverpool.

Morientes komst ekki í spænska landsliðshópinn fyrir HM í sumar, en hann kostaði Liverpool 6,3 milljónir punda þegar hann kom til félagsins frá Real Madrid í fyrra. Morientes skoraði aðeins fimm mörk í deildinni fyrir Liverpool á síðustu leiktíð.