Fækkun brota í flestum flokkum

Þjófnuðum, innbrotum, eignaspjöllum og ofbeldisbrotum fækkaði í umdæmi lögreglunnar á höfuðborgarsvæðinu í júlímánuði samanborið við sama mánuð í fyrra. Umferðarslysum fjölgaði hins vegar um 11% á milli ára.

Þetta kemur fram í Afbrotatölfræði lögreglustjórans á höfuðborgasvæðinu fyrir júlímánuð 2013. Þar segir að þjófnuðum í júlímánuði hafi fækkað um 9% samanborið við sama tímabil árið 2012, innbrotum um 18%, eignaspjöllum um 13% og ofbeldisbrotum um 3%. Tilkynningum um þjófnaði og innbrot fækkaði fjórða mánuðinn í röð.

„Sé miðað við markmið embættisins og tölur ársins 2013 bornar saman við sama tímabil 2010-2012 sést að þjófnuðum fækkaði um 20%, innbrotum um 43%, eignaspjöllum um 28% og ofbeldisbrotum fækkaði um 6%. Umferðarslysum hefur fjölgað um tæplega 2% á tímabilinu. Alls hafa verið skráðir 2.618 þjófnaðir á höfuðborgarsvæðinu það sem af er árinu 2013, 574 innbrot, 746 eignaspjöll og 428 ofbeldisbrot. Fjöldi umferðarslysa er 233 það sem af er ári,“ segir í Afbrotatölfræði LRH.