Samkomubann verður til 4. maí

Kolbeinn Tumi Daðason skrifar 2. apríl 2020 13:10

Miðbær Reykjavíkur á tímum kórónuveiru og samkomubanns. Vísir/Vilhelm

Þórólfur Guðnason sóttvarnalæknir hefur lagt til við heilbrigðisráðherra að samkomubanni vegna útbreiðslu kórónuveiru hér á landi verði aflétt mánudaginn 4. maí.

Þórólfur tilkynnti á upplýsingafundi almannavarna í gær að hann myndi leggja til að samkomubannið myndi gilda út apríl.

„Við viljum bara að þetta nái fram yfir helgina. Okkur finnst það heppilegra,“ segir Kjartan Hreinn Njálsson, aðstoðarmaður Landlæknis.

1. maí ber upp á föstudeginum en eðli máls samkvæmt verða engar kröfugöngur á meðan samkomubann er ríkjandi. Það takmarkast í dag við tuttugu á höfuðborgarsvæðinu en tíu í Vestmannaeyjum og fimm á norðanverðum Vestfjörðum.

Þórólfur hefur sagt ljóst að samkomubanni verði ekki aflétt nema hægt og í skrefum. Kjartan tekur undir það. Allt velti þetta á stöðu faraldursins á hverjum tíma.

Ríkisstjórn fundar á morgun og má reikna með því að Svandís Svavarsdóttir heilbrigðisráðherra kynni tillöguna fyrir ráðherrunum.

Samkomubann á Íslandi Faraldur kórónuveiru (COVID-19) Heilbrigðismál

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.