Gullaldarlið Íslands í toppbaráttunni á HM

Íslendingar eru hvarvetna að gera góða hluti þó eitt og annað vilji falla í skuggann vegna hins glæsta árangurs íslenska karlalandsliðsins í fótbolta á EM. Þannig er að skákstjörnur okkur standa í ströngu við að halda uppi heiðri lands og þjóðar.

„Gullaldarlið Íslands lagði þýska félagið Thüringen í þriðju umferð Heimsmeistaramóts skákliða 50 ára og eldri í Dresden í gær með tveimur og hálfum vinningi gegn einum og hálfum. Íslenska liðið hefur unnið allar viðureignir sínar á mótinu, líkt og fimm önnur lið, en alls keppa 59 sveitir á mótinu. Í fjórðu umferð mætir Gullaldarliðið sterkri þýskri sveit, sem skartar goðsögninni Arthur Jusupov á efsta borði,“ segir Hrafn Jökulsson sérlegur blaðafulltrúi íslenska liðsins.

Jóhann fann snjalla björgunarleið

Hrafn segir viðureignina við Thüringen afar spennandi. Jóhann Hjartarson mætti stórmeistaranum Peter Enders á 1. borði í mjög flókinni og skemmtilegri skák. „Jóhann stóð til vinnings en missteig sig í flókinni stöðu og virtist um tíma með tapað tafl. Hann fann snjalla björgunarleið og lauk skákinni með jafntefli.“

Og Hrafn heldur áfram að rekja gang mála: „Helgi Ólafsson fékk ívið verri stöðu á 2. borði gegn alþjóðlega meistaranum Thomas Casper, en Þjóðverjinn féllst fúslega á jafntefli. Jón L. Árnason náði vænlegri stöðu gegn stórmeistaranum Lutz Espig á 4. borði og vann peð, en hinum gamalreynda þýska meistara tókst að læsa stöðunni og jafntefli varð niðurstaðan.“

Sex sveitir unnið allar sínar viðureignir

En, það var svo Margeir Pétursson sem reyndist hetja sveitarinnar, en hann vann afar öruggan sigur á alþjóðlega meistaranum Joachim Brüggemann. Friðrik Ólafsson hvíldi að þessu sinni.

Þetta er gósentíð fyrir skákmanninn Hrafn sem hefur fylgst áratugum saman með ferli þessara fræknu kappa við svörtu og hvítu reitina. Af öðrum úrslitum má nefna að enska stórmeistarasveitin, með Nunn og Speelman í broddi fylkingar mátti þakka fyrir nauman sigur gegn mun stigalægri sveit Slóvakíu, og Armenar með Rafael Vaganian á efsta borði unnu stórsigur á þýska félaginu SC Forchheim.

Sex sveitir hafa unnið allar viðureignir sínar: Þýskaland, Armenía, England, þýska félagið Emanuel-Lasker Gesellschaff, Ísland og Kanada.

Jusupov er ógnvekjandi andstæðingur

„Búast má við mjög spennandi viðureign Gullaldarliðsins og Emanuel-Lasker Gesellschaff í fjórðu umferð. Arthur Jusupov, sem teflir á fyrsta borði í sveitinni sem kennd er við annan heimsmeistarann í skák, var um árabil í hópi allra sterkustu skákmanna heims,“ bætir Hrafn við og nefnir að hann hafi fæðst í Moskvu 1960, hann varð heimsmeistari ungmenna 1977, stórmeistari 1980, tvítugur að aldri og árunum 1986 til 1992 komst hann þrisvar sinnum í undanúrslit heimsmeistarakeppninnar. Hann flutti til Þýskalands eftir hrun Sovétríkjanna og er einn virtasti skákbókahöfundur samtímans.

Halldór Grétar Einarsson liðstjóri Gullaldarliðsins segir góða stemmningu í hópnum: „Margeir er að koma mjög sterkur til leiks og Jóhann leggur allt í skákirnar. Jón L. og Helgi eru aðeins ryðgaðir ennþá, en þeir munu fara í gang núna þegar alvaran er að byrja. Viðureignin við Jusupov og félaga er ágæt prófraun á liðið.“