Kerry til þjónustu reiðubúinn

John Kerry, forsetaframbjóðandi Demókrataflokksins, tók formlega við útnefningu flokksins í gærkvöld og flutti mikilvægustu ræðuna á ferli sínum. Kerry lagði megináherslu á að hann hefði gegnt herþjónustu í Víetnam og að hann yrði sterkur og stöðugur leiðtogi. "Ég heiti John Kerry og ég tilkynni mig til þjónustu reiðubúinn," sagði Kerry í ræðu sinni í dag við dynjandi lófaklapp áheyrenda. Troðfullt var í Fleet höllinni í gær og stemmningin mikil enda vissu þaulvanir laikstjórar þingsins hvernig magna ætti upp stemmningu með tónlist ljósadýrð og tilfinningaþrungnum frásögnum fjölskydu Kerrys og félaga hans úr Víetnam stríðinu. Kerry reyndi að sannfæra efasemdarmenn um að hann væri fær um að stýra bandarísku þjóðinni í gegnum erfiða tíma og gæti vel sinnt starfi æðsta yfirmanns hersins. Hann lagði áherslu á herþjónustu sína í Víetnam, sagðist vita hvað það væri að berjast í stríði og að það ætti ávallt að vera síðasta úrræðið. Hann myndi þó beita því úrræði til að verja hagsmuni þjóðarinnar með eða án samþykkis og samvinnu alþjóðasamfélagsins. "Sem forseti mun ég taka upp aftur fornar hefðir þjóðarinnar. Bandaríkin fara aldrei í stríð af því við viljum það. Við förum aðeins í stríð af því við neyðumst til þess." Hann ræddi einnig um gildi, trú og þjóðernishyggju og hann skilgreindi þau gildi upp á nýtt. Repúblikanar hafa alla jafna eignað sér þessa þætti en Kerry sótti á þeirra mið og sagði engan hafa einkarétt á bandaríska fánanum. Hann lofaði betri tíð og styrkari stjórn sem segði þjóðinni sannleikann. Gagnrýnin á stjórn Bush forseta var greinileg og óvægin þó að Kerry nefndi hvorki Bush né Cheney á nafn. Ræðan snérist einkum um forystu og leiðtogahæfileika. Kerry reyndi að virka forsetalegur frekar en kumpánalegur sem margir telja þó mikilvægt í kosningabaráttunni. Gagnrýnin hefur aðallega snúist um að þann mannlega þátt hafi vantað. Ræðan var einkum ætluð óákveðnum kjósendum og nú er spurningin hvernig þeir bregðast við.