Styrkir til barna í vímuefna- og áfengisvanda

Sex verkefni hlutu í dag styrk úr Minningarsjóði Sigrúnar Mjallar Jóhannesdóttur. Samtals hljóðaði styrkurinn upp á eina og hálfa milljón króna.

Kristján Kristjánsson tónlistarkennari fékk 185 þúsund fyrir meðferðarverkefni við atferlisvanda og vímuefnavanda.

Sunna Mjöll Estherardóttir meðferðaraðili fékk 230 þúsund krónur og mun styrkurinn sem hún hlaut nýtast í þjálfun hennar til að þróa skapandi verkefni í meðferðarstarfi unglinga. Sunna Mjöll hefur aðstoða ungmenni sem eiga við vímuefnavanda að stríða.

Hamarskot sem er meðferðar og búsetuúrræði fyrir ungmenni í vímuefnavanda fékk 200 þúsund krónur í styrk og hópastarf á vegum Davíðs Bergmann unglingaráðgjafa fékk 300 þúsund krónur í styrk.

Eftirmeðferð Stuðla fékk 300 þúsund króna styrk sem á að nýtast til kaupa á útivistar og tómstundarbúnaði fyrir unglinga sem eru í eftirmeðferð á Stuðlum eða öðrum meðferðarheimilum. Tilgangur þess verkefnis era ð gera unglingum kleift að takast á við skemmtileg og krefjandi verkefni til að efla félagsþroska og hæfni.

Laugaland, meðferðarheimili fyrir unglingsstúlkur á aldrinum 12 til 18 ára fékk einnig 300 þúsund krónur í styrk. Pétur Broddason, starfsmaður þar fékk styrkinn til þess að fara til Danmerkur með stúlkurnar sem eru í meðferð á Laugalandi. Á næsta ári er stefnt á að fara á Eurovision en í fyrra fór Pétur með stúlkurnar til London. Þrjár þeirra höfðu aldrei farið til útlanda áður og var það þeim öllum mikilvæg og jákvæð reynsla.

Eins og fram hefur komið á Vísi var minningarsjóðurinn stofnaður í minningu Sigrúnar Mjallar Jóhannesdóttur sem lést árið 2010 af völdum fíkniefna.

Tilgangursjóðsins er að styrkja skapandi verkefni ungmenna á aldrinum 12 til 18 ára sem eru í áfengis- og eða vímuefnameðferð á meðferðarheimilum á Íslandi. Sjóðurinn úthlutar styrkjum einu sinni á ári, á afmælisdegi Sigrúnar Mjallar þann 22. desember