Jafntefli varamannanna

Dick Cheney, varaforseti Bandaríkjanna, og John Edwards, varaforsetaefni demókrata, tóku hvorn annan engum vettlingatökum þegar þeir mættust í kappræðum í fyrrinótt. Edwards sakaði Cheney um að vera ekki heiðarlegan við almenning um gang stríðsins í Írak og sagði að bandarískir hermenn væru 90 prósent þeirra sem féllu í Írak. Cheney svaraði honum fullum hálsi og sagði Edwards gera lítið úr fórnum íraskra hermanna og lögreglumanna, þeir væru nær helmingur fallinna. Cheney sagði að John Kerry, forsetaframbjóðandi demókrata, hefði þrjátíu ára reynslu af því að taka vitlausa ákvörðun í varnarmálum í öldungadeild Bandaríkjaþings. Edwards sagði reynslu Bandaríkjamanna af stjórn Bush slæma og að þjóðin hefði ekki efni á að hafa hann sem forseta í fjögur ár í viðbót. Umdeilt er hvor komst betur frá kappræðunum. Samkvæmt könnun ABC meðal líklegra kjósenda þótti Cheney hafa betur, en Edwards í könnun CBS meðal óákveðinna kjósenda.