Arnarvarp truflað í Breiðafirði

Gasbyssu var stillt upp við arnarhreiður í hólma á Breiðafirði og fældu hvellirnir ernina og aðra fugla frá varpi í hólmanum. Vitað er hver var að verki, en samkvæmt lögum er stranglega bannað að hrófla við arnarhreiðrum. Gasbyssan var stillt þannig að hún sendi frá sér reglubundna hvelli sem fældu frá erni, ritu og grágæs sem voru að búa sig undir varp í hólmanum. Málið var kært til viðkomandi sýslumanns og lét hann fjarlægja búnaðinn. Kristinn H. Skarphéðinsson líffræðingur segir að það ljóst sé að búnaðinum hafi verið komið upp til þess að styggja erni sem hafi reynt að hreiðra um sig í hólmanum og nálægum hólum um árabil án þess að varp hafi nokkurn tíma lukkast hjá þeim. Þetta er ekki í fyrsta sinn sem arnarvarp er truflað á þessum slóðum. Maður sem það gerði var ákærður fyrir verknaðinn en sýknaður í Hæstarétti þar sem lögin voru ekki talin nógu skýr. Alþingi hefur síðan gert ákvæði þessa efnis afdráttarlausari. Vitað er hver var að verki en það skal tekið fram ekki er um sama mann að ræða. En hvers vegna er þessum mönnum svona illa við ernina? Kristinn segir að það sé vegna æðarvarps en tekur skýrt fram að um örfáa einstaklinga sé að ræða. Langflestir æðarbændur virði hreiðurhelgi arnarins og láti hann í friði. Þess vegna hafi arnarstofnin vaxið undanfarin ár, en hann sé smám saman að komast yfir hættumörk. Arnarstofninn hefur þrefaldast á fjörutíu árum, hann telur nú rúmlega sextíu pör. Kristinn segir það rétt að örninn éti talsvert af æðarfugli en hafa verði í huga að hann sé hluti af náttúrunni.