Gagnrýnir lögregluna

Lýður Guðmundsson gerir ?alvarlegar athugasemdir við rannsóknaraðferðir lögreglu? í máli gegn honum og Bjarnfreði H. Ólafssyni lögmanni. Í greinargerð verjanda Lýðs, Gests Jónssonar, eru rannsóknaraðferðir lögreglunnar sagðar í ósamræmi við grundvallarreglur sakamálalaga og að lögregla hafi brotið gegn hlutlægnis- og meðalhófsreglum.

Lýður er ákærður fyrir stórfellt brot gegn hlutafélagalögum. Honum er gefið að sök að hafa vísvitandi brotið gegn ákvæðum um greiðslu hlutafjár með því að greiða minna en nafnverð fyrir nýtt hlutafé í Existu í desember 2008. Nafnvirði hlutanna var fimmtíu milljarðar en lagður var fram einn milljarður. Upphæðin rann aldrei inn í rekstur Existu samkvæmt ákærunni. Hann er ákærður sem stjórnarmaður einkahlutafélagsins BBR, sem keypti umrætt hlutafé og borgaði fyrir það með hlutum í einkahlutafélaginu Kvakki.

Þá eru Lýður og Bjarnfreður ákærðir fyrir að hafa vísvitandi skýrt rangt og villandi frá hækkun á hlutafé Existu þegar tilkynning var send til hlutafélagaskrár, en þar kom fram að hlutafjárhækkunin hefði að fullu verið greidd. Brotin varða allt að tveggja ára fangelsi. Það að ákærunni sé ekki beint að stjórn félagsins, sem tók ákvörðun um hækkun og útgáfu nýs hlutafjár, vekur athygli, segir í greinargerðinni.

Lýður segir lögreglu hafa reynt að villa um fyrir vitnum málsins við rannsóknina, og gagnrýnir það harðlega. Lögregla hafi lagt hald á skjöl sem staðfestu vaxtagreiðslu Existu af sambankaláni sem var á gjalddaga 5. desember 2008. Þrátt fyrir það segir Lýður að fyrrverandi stjórnarmönnum hafi verið sagt við yfirheyrslur að engin slík skjöl hafi fundist í húsleitum.

Þá segir í greinargerðinni að gripið hafi verið til tilefnislausra þvingunarráðstafana gegn honum. Tilefnislaus húsleit hafi verið gerð á heimilum hans bæði á Íslandi og í Bretlandi, en engin gögn sem voru haldlögð þar voru lögð fram fyrir dómi.

Sími Lýðs var hleraður í tæpan mánuð árið 2010. Hann er ósáttur við að hann hafi ekki verið upplýstur um hleranirnar fyrr en tveimur árum eftir að þeim lauk. Þá hafi engin símagögn verið lögð fram fyrir dómi.

Lýður gagnrýnir líka þann drátt sem varð á rannsókn málsins. Skýrslur voru teknar í janúar og febrúar 2010, en þegar ákæran var gefin út hafði málið verið í rannsókn hjá sérstökum saksóknara í um 33 mánuði.

thorunn@frettabladid.is