Fór úr axlarlið á miðri sýningu

„Viðtökurnar voru alveg frábærar og við hlökkum mikið til að sýna hérna heima,“ segir Hafdís Maria Matsdóttir. Hún leikur annað hlutverkanna í nýrri leiksýningu fyrir börn á öllum aldri sem kallast Hafdís og Klemmi – og leyndardómar háaloftsins.

Sýningin var frumsýnd í Noregi fyrir skömmu og var sýnd á fjórum stöðum, í Kristiansand, Osló, Bergen og Stavanger. Á þriðju sýningu, í Bergen, fór Jóel Ingi Sæmundsson sem leikur Klemma í sýningunni úr axlarlið.

„Þetta sló okkur aðeins út af laginu en við vorum fljót að ná áttum og héldum sýningunni áfram. En Jóel er vanur að detta úr lið því þetta eru gömul körfuboltameiðsl og hann beið bara rólegur efir að öxlin fór í lið aftur. Fólkið í salnum hélt að sýningin hefðu bara átt að vera svona,“ segir Hafdís og hlær.

Vegna þess að í sýningunni er notast mikið við tæknileg atriði eins og myndbönd sem varpað er upp á vegg með skjávarpa er mjög erfitt að stoppa sýningu og byrja upp á nýtt þegar eitthvað kemur upp á.

Sýningin fjallar um ævintýri vinanna tveggja sem finna dularfullt tæki uppi á háalofti heima hjá ömmu Hafdísar. Persónur sýningarinnar eru þau Hafdís og Klemmi sem eru jafnframt aðalpersónur þáttaseríunnar Daginn í dag en sýningin er sjálfstætt framhald þáttanna.

„Umfjöllunarefni sýningarinnar eru hæfileikar. Allir hafa ólíka hæfileika og maður getur nýtt hæfileika sína til góðs. Við gerum mikið upp úr þátttöku barnanna í áhorfendasalnum,“ segir Hafdís.

Sýningin verður frumsýnd á laugardaginn klukkan 14.00 í Lindakirkju, Kópavogi, það er þó aðeins ein sýning í boði. Mikið er gert úr frumsýningunni hér á Íslandi og fá börnin sem mæta  glaðning að sýningu lokinni. Þau fá jafnvel að hitta skemmtilegar persónur úr Daginn í dag þáttunum að meðtöldum brúðunum sem verða til sýnis. Hægt er að nálgast miða í gegnum netfangið hafdisogklemmi@gmail.com eða með því að hringja  í s. 544 4477.