Innlent

Mikil fækkun brota eftir að kórónuveiran greindist hér á landi

Eiður Þór Árnason skrifar
Tölurnar benda til þess að færri mál hafi komið inn á borð lögreglunnar á höfuðborgarsvæðinu í marsmánuði en alla jafna.
Tölurnar benda til þess að færri mál hafi komið inn á borð lögreglunnar á höfuðborgarsvæðinu í marsmánuði en alla jafna. Vísir/vilhelm

Mikil fækkun var í fjölda skráðra hegningarlagabrota hjá lögreglunni á höfuðborgarsvæðinu í mars, ef horft er til meðalfjölda brota síðasta hálfa og heila árið.

Alls voru 514 hegningarlagabrot skráð á höfuðborgarsvæðinu í mars og fækkaði þeim á milli mánaða. Þar af fækkaði tilkynningum meðal annars um þjófnaði, innbrot og ofbeldisbrot. Tilkynningum um heimilisofbeldi fjölgaði þó á milli mánaða. Þetta kemur fram í mánaðarskýrslu lögreglustjórans á höfuðborgarsvæðinu fyrir marsmánuð.

Ef fjöldi brota í mars er borinn saman við meðalfjölda síðasta hálfa og heila árið sést mikil fækkun í tilkynningum um þjófnaði, minniháttar eignaspjöll, umferðalagabrot, ölvun við akstur og akstur undir áhrifum ávana- og fíkniefna.

Að sama skapi sést fækkun í tilkynningum um innbrot, manndráp og líkamsmeiðingar, kynferðisbrot og fíkniefnalagabrot samanborið við meðalfjölda brota síðustu mánuði.

Þess ber að geta að um er að ræða bráðabirgðatölur og getur fjöldi skráðra brota í mars breyst  vegna brota sem kærð eru seint til lögreglu.

Tafla úr mánaðarskýrslu lögreglustjórans á höfuðborgarsvæðinu fyrir marsmánuð.Lögreglan

Engar skýringar eru lagðar fram í skýrslunni á þessari þróun. Þó má leiða líkur að því að faraldur kórónuveirunnar, með tilkomu samkomubanns, samdrætti í samgöngum og aukinni félagslegri fjarlægð hafi mögulega haft hér áhrif. Fyrsta staðfesta tilfelli veirunnar greindist hér á landi þann 28. febrúar síðastliðinn.

Fréttin hefur verið uppfærð.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.