Atvinnulíf

Erfiðast að hitta ekki starfsfólk

Rakel Sveinsdóttir skrifar
Björn Ragnarsson framkvæmdastjóri Kynnisferða segir upplýsingamiðlun til starfsfólks krefjandi verkefni á óvissutímum.
Björn Ragnarsson framkvæmdastjóri Kynnisferða segir upplýsingamiðlun til starfsfólks krefjandi verkefni á óvissutímum. Vísir/Vilhelm

„Án efa er erfiðast að geta ekki haldið starfsmannafundi, hitt starfsmenn og rætt málin,“ segir Björn Ragnarsson framkvæmdastjóri Kynnisferða aðspurður um það hvernig það er að standa að upplýsingamiðlun til starfsfólks á erfiðum tímum. 

Hann segir starfsfólk þó hafa sýnt aðstæðum skilning. „Við erum virkilega þakklát fyrir því hversu mikinn skilning starfsfólkið okkar hefur á breyttum aðstæður og er almennt annt að verja hagsmuni fyrirtækisins,“ segir Björn. 

Hjá Kynnisferðum er stærsti hluti starfsfólks komið í skert starfshlutfall og það á við um alla sem starfa hjá Ferðaskrifstofu, Hópbifreiðum og Bílaleigu Kynnisferða. Til viðbótar telst síðan sú eining sem þjónustar akstur fyrir Strætó, þ.e. Almenningsvagnar Kynnisferða. Sú starfsemi hefur dregist saman um 25-30% og er hluti starfsmanna þar því einnig komið í skert starfshlutverk.

Í dag fjallar Atvinnulífið á Vísi um upplýsingamiðlun til starfsfólks á erfiðum tímum.

Þótt fjarlægðin sé erfið, segir Björn tæknina hafa komið sterka inn síðustu vikurnar. „Við höfum nýtt innri vefinn okkar, samfélagsmiðla, Teams, tölvupósta og smáskilaboð til að koma upplýsingum á framfæri og vera í samskiptum. Næstu yfirmenn eru líka í góðu sambandi við sitt fólk,“ segir Björn.

Hann segir starfsfólkið samanstanda af fjölbreyttum hópi fólks á öllum aldri, nokkrum þjóðernum og fólk sé misjafnlega tæknifært. „Það hefur líka reynst áskorun en flestir eru að læra ansi hratt þessa dagana,“ segir Björn. 

En þótt tæknin sé góð minnir Björn líka á það mannlega. 

„Svo skiptir líka miklu máli að taka upp símann og heyra í fólki,“ segir Björn.

Aðspurður um það hvernig hægt er að miðla upplýsingum til starfsfólks um áætlanir eða ný áform í kjölfar kórónufaraldurs, segir Björn stöðuna breytast of hratt og óvissuna of mikla til þess að það sé hægt.

„Því miður vitum við lítið um framhaldið og eigum erfitt með að sjá hvað gerist næstu mánuði,“ segir Björn og bætir við „Við erum öll að fá nýjar upplýsingar á hverjum degi um þróun mála og erum í raun að endurmeta stöðuna daglega. Við munum áfram upplýsa starfsfólk eftir því sem línur skýrast.“

Á krísutímum er þeirri spurningu stundum velt upp, hversu ítarlega stjórnendur eiga að fara yfir rekstrar- og fjárhagsstöðu fyrirtækja með starfsfólki. 

Í tilfelli Kynnisferða sér Björn ekki fyrir sér neinar breytingar í þeim efnum því slík upplýsingamiðlun hefur verið áhersla hjá þeim síðustu árin.

„Við höfum verið opin að upplýsa okkar starfsmenn um rekstrar- og fjárhagsstöðu fyrirtækisins síðustu árin,“ segir Björn og bætir við „Það skiptir máli að starfsfólk viti hvernig fyrirtækinu þeirra gengur og hvernig staðan er hverju sinni.“


Tengdar fréttir





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.