Útlit er fyrir suðvestan strekking eða allhvassan vind í dag, 10 til 18 metrar á sekúndu, með rigningu sem einkum verður bundin við vesturhelming landsins.
Í hugleiðingum veðurfræðings segir að það verði milt í veðri og hiti yfirleitt á bilinu þrjú til átta stig. Þó gæti skriðið í rétt rúmlega tíu stig á Austfjörðum og Suðausturlandi. Í kvöld dregur svo úr úrkomu og kólnar.
„Á morgun verður stífur vindur úr vestri, sums staðar hvassviðri. Með fylgja él, en austanlands hangir þurrt. Það heldur áfram að kólna og frost allt að 5 stig síðdegis. Undir kvöld snýst vindur til norðlægrar áttar og snjókomubakki kemur inn á norðanvert landið, en þá má búast við stöku éljum syðra.
Út vikuna er síðan ekkert nema kuldi í kortunum - frost á öllu landinu. Í ofanálag verður vindur stundum hvass og áður en vikan er á enda eru líkur á að það hafi snjóað í öllum landshlutum.“
Yfirlit: Það er víða ansi hvasst um norðan- og austanvert landið sem veldur því að sumstaðar nær að skafa inn á veg og skapa krap eða hálkubletti þótt hlýtt sé í veðri og vegir að mestu leyti auðir. Upplýsingasíminn 1777 er opinn alla daga kl. 06:30-22:00. #færðin
— Vegagerðin | Iceland Roads (@Vegagerdin) March 31, 2020
Veðurhorfur á landinu næstu daga
Á miðvikudag: Vestan 13-20 m/s og él, en úrkomulítið austanlands. Kólnandi, frost 0 til 5 stig síðdegis. Norðlægari um kvöldið og snjókoma á norðurhelmingi landsins.
Á fimmtudag: Minnkandi norðanátt. Léttskýjað sunnan- og vestanlands, en él um landið norðaustanvert. Frost 2 til 8 stig.
Á föstudag: Norðlæg átt og kalt í veðri. Él N- og A-lands og snjókoma við S-ströndina síðdegis.
Á laugardag: Austan og norðaustan hvassviðri eða stormur. Víða snjókoma og áfram kalt í veðri.
Á sunnudag: Norðaustanátt og snjókoma eða él norðan- og austanlands. Úrkomulaust að mestu á Suður- og Vesturlandi, en dálítil snjókoma með suðurströndinni. Frost um allt land.
Á mánudag: Austlæg átt og líkur á snjókomu eða éljum í flestum landshlutum.
