Viðskipti innlent

Ellefu flug­mönnum sagt upp hjá Blá­fugli

Atli Ísleifsson skrifar
Sigurður Örn Ágústsson, forstjóri Bláfugls.
Sigurður Örn Ágústsson, forstjóri Bláfugls. bláfugl

Fragtflugfélagið Bláfugl hefur sagt upp ellefu flugmönnum fyrirtækisins í hagræðingarskyni. Þetta kemur fram í tilkynningu frá fyrirtækinu.

Þar segir að flugmennirnir séu meðlimir í Félagi íslenskra atvinnuflugmanna og langlaunahæstu starfsmenn Bláfugls. 

„Þegar hefur verið ráðist í fjölbreyttar aðgerðir á árinu, svo sem fækkun stöðugilda, flutning í hagkvæmara húsnæði og útvistun hluta af starfsemi. Þá hafa aðrir starfsmenn fyrirtækisins tekið á sig tímabundna kjaraskerðingu á árinu.

Eftir að uppsagnirnar koma til framkvæmda verða starfsmenn Bláfugls 29 og sjálfstætt starfandi flugmenn 40. Bláfugl býður flugmönnum góð kjör sem eru samkeppnishæf við þá markaði sem Bláfugl starfar á. Umræddir flugmenn eru meðal annars íslenskir, danskir, þýskir, belgískir og hollenskir. Bláfugl er eftir sem áður mannað vel hæfu fólki með metnað fyrir sínum störfum. Aðgerðirnar munu því ekki koma niður á starfsemi fyrirtækisins,“ segir í tilkynningunni.

Haft er eftir Sigurði Erni Ágústssyni forstjóra að uppsagnirnar séu nauðsynlegar til að tryggja samkeppnishæfni Bláfugls á markaði sem hafi tekið örum breytingum á undanförnum árum. „Með þessari aðgerð tryggjum við samkeppnishæfni Bláfugls til framtíðar og eigum möguleika á að hefja vaxtarskeið – með tilheyrandi fjölgun starfa á Íslandi“, segir Sigurður Örn.

Bláfugl starfar undir hjáheitinu Bluebird Nordic, var stofnað árið 1999 og hóf flugstarfsemi árið 2001 með íslenskt flurekstrarleyfi. Félagið hefur verið með allt að 8 B737 fraktflugvélar í rekstri. Greint var frá kaupum Avia Solutions Group á Bláfugli fyrr á árinu.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×