Golf

Sjáðu Tiger Woods rifna úr stolti eftir örninn hjá ellefu ára syni sínum

Óskar Ófeigur Jónsson skrifar
Tiger Woods fagnar hér stráknum sínum eftir að Charlie tryggði feðgunum örn á þriðju holu.
Tiger Woods fagnar hér stráknum sínum eftir að Charlie tryggði feðgunum örn á þriðju holu. AP/Phelan M. Ebenhack

Tiger Woods og ellefu ára sonur hans Charlie urðu í sjöunda sæti á fyrsta golfmóti sínu saman um helgina.

Það var ekki hægt að sjá eða heyra annað en að Tiger Woods hafi notið þess að spila með stráknum sínum á PNC Championship góðgerðamótinu um helgina.

Tiger og Charlie Woods enduðu í sjöunda sæti (af tuttugu tveggja kylfinga liðum) og voru fimm höggum á eftir sigurvegurum mótsins sem voru Justin Thomas og faðir hans.

Á þessu móti spila þekktir kylfingar með föður eða börnum sínum. Charlie Woods er samt langyngsti keppandinn í sögu mótsins.

Justin Thomas er í þriðja sæti á heimslistanum en hann og faðir hans enduðu mótið á fimmtán höggum undir pari. Í öðru sæti og aðeins höggi á eftir voru Vijay Singh og sonur hans Qass.

Augu marga voru hins vegar á Tiger og Charlie Woods enda margir forvitnir að sjá hvert að hinn ellefu ára gamli Charlie hefði erft eitthvað frá föður sínum.

Það var einkum ein hola á fyrri deginum sem vakti mikla lukku ekki síst hjá Tiger Woods sjálfum. Charlie kláraði þá örninn á þriðju holu með laglegu höggi inn á flöt og svo með flotti pútti í framhaldinu.

Eins og sjá má hér fyrir neðan þá var Tiger sérstaklega kátur og stoltur af syni sínum eftir að hann setti púttið sitt ofan í holu.

Tiger Woods var líka mjög sáttur með alla helgina og það að hann gat spilað með stráknum sínum þrátt fyrir að vera sjálfur að glíma við bakmeiðsli.

„Ég held að ég geti ekki fundið réttu orðin til að lýsa þessari tilfinningu. Bara það að við gátum upplifað þetta saman og búið til minningu sem mun endast alla ævi,“ sagði Tiger Woods.

Charlie Woods hefur lært margt af föður sínum sem sást um helgina. Það var þannig mjög gaman að fagna þessum fugli eins og Tiger hefur gert svo oft.

Hér fyrir neðan má einnig sjá fleiri svipmyndir frá Woods feðgunum frá helginni.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.