Um síðustu áramót var breytt um aðferð við verðlagningu á tollakvóta á innfluttum landbúnaðarvörum. Það leiddi til þess að vörur eins og kalkúnabringur lækkuðu töluvert mikið í verði. Alþingi er hins vegar þessa stundina að afgreiða breytingu á búvörulögum sem mun fara með aðferðina aftur til fyrri vegar sem mun leiða til þess að innfluttar kalkúnabringur og nautalundir til dæmis munu hækka í verði um mörg hundruð krónur hvert kíló.
Hér varð fréttamanni fótaskortur á tungunni því um er að ræða kalkúnabringur en ekki kjúklingabringur í þessu tilviki.
Breytingarnar áttu samkvæmt frumvarpi Kristjáns Þórs Júlíussonar landbúnaðarráðherra að gilda í eitt ár til að bæta stöðu innlendrar framleiðslu vegna minni eftirspurnar í kórónuveirufaraldrinum. Ólafur Stephensen framkvæmdastjóri Félags atvinnurekenda undrast að atvinnuveganefnd bæti um betur og legg til að breytingarnar vari í þrjú ár.
„Samtök bæði verslunar í landinu og almennings eins og Neytendasamtökin og Alþýðusambandið auk Samkeppniseftirlitsins lögðust eindregið gegn frumvarpinu eins og það var. Eins slæmt og það var,“ segir Ólafur.
Nefndin geri frumvarpið þrefalt verra fyrir verslunina og neytendur.
„Innflytjendur munu þurfa að greiða meira fyrir innflutningskvótana og það fer að sjálfsögðu út í verðlagið. Enda er það tilgangurinn með þessum aðgerðum. Að vernda innlenda framleiðslu með því að gera útlendu framleiðsluna dýrari og þá geta innlendir framleiðendur haldið uppi verðinu á sinni framleiðslu,“ segir Ólafur.
Bæta ætti bændum og afurðastöðvum kórónukreppuna með sama hætti og örðum atvinnugreinum með almennum aðgerðum.
„Bændur fái til dæmis beinan stuðning. Afurðastöðvar hafi aðgang að hinum almennu úrræðum eins og styrkjum, lánum og annað slíkt ef þær uppfylla skilyrðin.“ Í stað þess að senda neytendum reikninginn á sama tíma og tuttugu og fimm þúsund manns séu án atvinnu.
„Horfðu á úr hvaða kjördæmum þingmennirnir í meirihluta atvinnuveganefndar koma. Þeir eru að ganga erinda þröngra sérhagsmuna. Það er nú bara svo einfalt,“ segir Ólafur Stephensen.
