Heimsmarkmiðin

Skortur á vatni og hreinlæti í fjórðungi heilbrigðisstofnana

Heimsljós
Gunnisal

Aðgengi að vatni, salernis- og hreinlætisaðstöðu á heilbrigðisstofnunum er ábótavant í ákveðnum heimshlutum, sérstaklega í þróunarríkjum.

Í einni af hverjum fjórum heilbrigðisstofnunum í heiminum skortir aðgengi að vatni og hreinlætisaðstöðu sem eykur hættuna á því fyrir starfsfólk og sjúklinga – um 1,8 milljarð einstaklinga – að smitast af kórónaveirunni og öðrum bráðsmitandi veirum. Þetta kemur fram í nýrri sameiginlegri skýrslu Barnahjálpar Sameinuðu þjóðanna (UNICEF) og Alþjóðaheilbrigðisstofnunarinnar (WHO) byggða á könnun sem náði til 165 landa.

„Að vinna á heilbrigðisstofnun án vatns, salernis- og hreinlætisaðstöðu er sambærilegt við að senda hjúkrunarfræðinga og lækna til vinnu án skjólfatnaðar,“ segir Tedros Adhanom Ghebreyesus framkvæmdastjóri WHO. „Vatn, salernis- og hreinlætisaðstaða á heilbrigðisstofnunum er grundvallaratriði til að stöðva COVID-19. Í ákveðnum heimshlutum þarf að bæta aðstöðu í þessum efnum, sérstaklega í þróunarríkjum.“

Heilbrigðisstarfsfólk er í meiri hættu en aðrir að smitast af kórónaveirunni. Það sést á tölum sem koma fram í skýrslunni. Heilbrigðisstarfsfólk telur 3 prósent mannkyns en 14 prósent hafa veikst af COVID-19. „Að senda heilbrigðisstarfsfólk og þá sem veikir eru og þurfa meðferð inn á stofnanir þar sem ekki er að finna hreint vatn, örugga salernisaðstöðu eða jafnvel sápu – það heitir að stofna lífi fólks í hættu,“ segir Henrietta Fore framkvæmdastýra UNICEF.

Samkvæmt skýrslunni – Global Progress Report on WASH in Health Care Facilities – gat þriðjungur heilbrigðisstofnana í heiminum ekki tryggt handþvott og ein af hverjum tíu hafði ekki upp á viðunandi salernisaðstöðu að bjóða. Staðan er enn verri ef horft er til 47 fátækustu ríkja heims þar sem helmingur heilbrigðisstofnana hafði engan aðgang að hreinu drykkjarvatni, fjórðungur engan aðgang að vatni til handþvotta eða annars hreinlætis, og þrjár af hverjum fimm skorti salernisaðstöðu.

Að mati WHO og UNICEF myndi kosta um 130 krónur á hvern íbúa að tryggja úrbætur á þessu sviði í viðkomandi ríkjum og 26 krónur til viðhalds á ári hverju.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.