Íranskur blaðamaður tekinn af lífi

Hallgerður Kolbrún E. Jónsdóttir skrifar 12. desember 2020 22:41

Blaðamaður sem sakaður var um að hafa ýtt undir borgaralega óhlýðni var tekinn af lífi í Íran í dag. Amnesty International segir að hann hafi verið fórnarlamb ósanngjarnra réttarhalda sem hafi stólað á játningu sem þvinguð var upp úr honum.

Blaðamaðurinn Ruhollah Zam var hengdur í dag, laugardag, eftir að hæstiréttur staðfesti dauðarefsingu hans. Þetta kemur fram á vef breska ríkisútvarpsins.

Zam hafði verið í útlegð í Frakklandi frá 2018 en var handtekinn þegar hann ferðaðist til Írak í fyrra.

Zam rak Amad News, vinsæla fréttasíðu sem opinberlega gagnrýndi stjórnvöld í Íran. Hann var sakaður um að hafa hvatt til mótmælanna í landinu sem fóru fram 2017-2018.

Fréttasíðan birti myndbönd af mótmælunum og ýmsar upplýsingar um íranska ráðamenn sem þeim líkuðu ekki. Fréttasíðan hafði meira en milljón fylgjendur á lokaða forritinu Telegram.

Aðgangi fréttasíðunnar var eytt af Telegram á einum tímapunkti fyrir að hafa birt „hættulegt efni,“ en opnaði síðan annað aðgang undir nýju nafni.

Faðir Zam, Mohammad Ali Zam, var klerkur og umbótasinni. Hann var sakfelldur fyrr á þessu ári fyrir „spillingu á jörð“ (e. corruption on earth) sem er eitt alvarlegasta lögbrot í landinu.

Íran Mannréttindi Dauðarefsingar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.