Fjórir greindust með veiruna innan­lands í gær

Þetta kemur fram í uppfærðum tölum á vefnum covid.is. 32 eru nú á sjúkrahúsi vegna Covid-19 og þar af þrír á gjörgæslu. Í gær voru 33 á sjúkrahúsi, þar af þrír á gjörgæslu.

Tveir greindust á landamærum – einn með virkt smit og er niðurstöðu mótefnamælingar beðið í tilviki hins.

183 manns eru nú í einangrun, en fjöldinn var 186 í gær. Þá eru 249 í sóttkví í dag, samanborið við 227 í gær.

Af þeim fjórum sem greindust í gær greindust allir eftir svokallaða einkennasýnatöku.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur, er nú 44,5 en var 46,4 í gær. Þá er nýgengi landamærasmita nú 9,8, en var 9,0 í gær.

Alls hafa 5.524 manns greinst með kórónuveiruna hér á landi frá því faraldurinn hófst í lok febrúar. Þá hafa 28 dauðsföll verið rakin til Covid-19.

Alls voru tekin 770 einkennasýni hjá sýkla- og veirufræðideild Landspítalans og Íslenskri erfðagreiningu í gær og 349 sýni á landamærunum eða í seinni landamæraskimun. Þá voru sautján sýni tekin í annarri skimun hjá Íslenskri erfðagreiningu.

Fréttin hefur verið uppfærð.