Öryggisstjóri Apple ákærður fyrir að reyna að múta lögreglu með iPad-tölvum

Vésteinn Örn Pétursson skrifar 24. nóvember 2020 22:09

Thomas Moyer, alþjóðaöryggisstjóri hjá tæknifyrirtækinu Apple, hefur verið ákærður fyrir að hafa reynt að múta lögreglumönnum. Hann er sagður hafa boðið þeim hundruð iPad-spjaldtölva, með það að markmiði að fá leyfi fyrir fjóra starfsmenn Apple til að bera byssur innan klæða. Guardian-fjallar um málið.

Saksóknarar í Kaliforníu segja tvo lögreglumenn hafa tekið þátt í ráðabrugginu. Þeir hafi hafnað umsókn um leyfi starfsmanna til vopnaburðar nema þeir fengju eitthvað í staðinn.

Moyer er þá sagður hafa reynt að fá umsóknirnar samþykktar með því að bjóða lögregluumdæminu 200 iPad-spjaldtölvur, endurgjaldslaust. Virði spjaldtölvanna er um 70.000 dollarar, eða rúmlega níu og hálf milljón króna.

Afhending spjaldtölvanna fór aldrei fram, en saksóknarar segja að hætt hafi verið við hana á síðustu stundu eftir að Moyer og annar lögreglumannana komist að því að verið væri að rannsaka málið og húsleit hefði farið fram í húsakynnum lögreglu vegna þess.

Lögreglumennirnir tveir, Rick Sung og James Jensen, hafa einnig verið ákærðir. Sung fyrir að falast eftir mútum og Jensen fyrir að hjálpa honum við það.

Apple Bandaríkin

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.