„Virkilega ömurlegt að vakna í dag!“

Óhætt er að segja að nokkur vonbrigði hafi brotist út víða á samfélagsmiðlum í nótt og nú í morgun þegar Íslendingar áttuðu sig á því, með stírur í augum sumir – aðrir stjarfir eftir vökunótt – að ýmislegt bendir til þess að Donald Trump forseti Bandaríkjanna muni hafa sigur í forsetakosningunum vestan hafs. Vart er ofsagt að flestir Íslendingar hafi vonast til þess að bandarískir kjósendur myndu gefa Trump rauða spjaldið en svo virðist ekki vera. 

Því er grunnt á því góða og má greina gremju í tali margra þeirra sem tjáð hafa sig í morgun. Vísir skautaði yfir Facebook nú í morgun og það var heldur dauft hljóðið í mannskapnum.

Þetta er ekki einu sinni fyndið

Þannig beinir Kristinn Hrafnsson reiði sinni í garð þeirra sem spáðu fyrir um sigur Joe Biden og hann lætur sig ekki muna um að skjóta sendiboðann í leiðinni því íslenskir fjölmiðlar áttu ekkert með það, að mati Kristins, að greina frá slíkum spám.

„Íslenskur almenningur á núna að krefjast skýringa á því af hverju þessi niðurstaða sprettur fram þrátt fyrir að flestir fjölmiðlar töldu þeim trú um að þetta væri fjarstæður veruleiki,“ segir Kristinn meðal annars í pistli sem hann ritaði í nótt. Hann segir íslenskan almenning vakna til stórra spurninga. Allt bendi til að Trump verði forseti næstu fjögur árin þrátt fyrir að flestir „sérfræðingar“ teldu slíkt nánast útilokað.

Gylfi Magnússon lektor við HÍ og fyrrverandi fjármálaráðherra Íslands er ekki að orðlengja þetta: „Úff. Fjögur ár í viðbót.“ Og Illugi Jökulsson rithöfundur segir: „Þetta er ekki einu sinni fyndið.“ 

Vitlausar kannanir

Fjölmargir lýsa yfir sárum vonbrigðum. *“Ótrúlegt að fylgjast með þessu. Ég er búinn að slökkva í bili. Setti á sellókonsert eftir Haydn,“ segir Einar Karl Friðriksson ráðgjafi.

Og Gunnar Smári Egilsson fjölmiðlamaður er á svipuðum slóðum og Kristinn Hrafnsson. Hann segir umhugsunarefni að kannanir séu svo misvísandi og telur einsýnt að þeir sem setji þær fram séu demókratar.

„Það er ekki bara að heildarniðurstaðan sé vitlaus heldur er ljóst að spá fyrir hvert fylki verður vitlausari eftir því að farið er lengra frá ströndunum, það er því augljóst að vigtun kannana byggjast á afstöðu fólksins á svæðum sem hallast mjög að demókrötum.“

What happend America?

Björk Eiðsdóttir blaðamaður setur kall með skeifu við sína færslu til marks um að hún sé leið.

„Virkilega ömurlegt að vakna í dag! Verra en fyrir fjórum árum því nú eru kjósendur með reynslu af þessu fífli! What happened America?“

Sirrí Arnardóttir fyrirlesari og fjölmiðlakona er meðal fjölmargra sem tjá sig á vegg Bjarkar og hún segir: „Ég er miður mín.“ Og Þórunn Erna Clausen leik- og tónlistarkona segir: „Já, Jesús minn, þetta er rosalegt allt saman.“

Bryndís Ásmundsdóttir leikkona tekur einnig þátt í umræðum á þeim vettvangi og hún býður upp á athyglisverða greiningu á Bandaríkjamönnum upp til hópa:

„Þetta er lýsandi dæmi um þolendur ofbeldis… Stútfullt af ranghugmyndum, treysta ekki eigin dómgreind, fara bara eftir því sem sagt er … Þessi snarvitlausi einstaklingur er gargandi narcisisti, siðblindingi og ofbeldismaður með meiru, sannfæring, síendurtekning og gaslýsing er meðal annars það sem hann notar … og fólk bara blindast og þorir ekki öðru en að fylgja þessum andskota!“

Átta ár af Trump er of mikið

Og Ágúst Ólafur Ágústsson þingmaður Samfylkingar fórnar höndum á sínum Facebookvegg. Hann vill meina að átta ár af Trump í lífi hvers manns sé alltof alltof mikið.

Kristján Guy Burgess ráðgjafi, eiginmaður Rósu Bjarkar Brynjólfsdóttur alþingismanns, vill þó ekki gefa upp alla von um að Biden sigri og hvetur mannskapinn til að tapa nú ekki gleðinni.

Einar Gautur Steingrímsson lögmaður notar tækifærið og gaukar að ráðleggingu á sínum Facebookvegg til Bjarna Benediktssonar formanns Sjálfstæðisflokksins:

„Þar sem Trump er að vinna vill hann hætta talningu. Bjarni Ben ætti að gera þetta þegar atkvæði hafa verið talin í Garðabæ og Seltjarnarnesi í næstu kosningum,“ segir Einar Gautur og bætir við broskalli svona til að sverfa oddinn af orðum sínum.

Twitter elskar að hata Trump

Þannig er hljóðið meira og minna í mannskapnum á Facebook, þó einhverjir vilji nú gefa sig fram með þau skilaboð að þeir hafi nú séð þetta fyrir allan tímann. Og ekki vantar að ýmsir séu sársvekktir sem tjá sig á Twitter einnig þó sá samfélagsmiðill hafi verið helsti vettvangur Trumps sjálfs. Hulda Hólmkelsdóttir upplýsingafulltrúi þingflokks Vinstri grænna er ekki kát þó hún kunni þá kúnst að gera grín að sjálfri sér.

Og þannig gengur dælan, ljóst er að þó einhverjir hrósi sigri, og þykist jafnvel hafa vitað hvað klukkan sló, eru margir þeirra Íslendinga sem tjá sig á samfélagsmiðlum í hálfgerðu áfalli.