Innlent

Ætlaði að æða inn í reykjar­mökkinn þegar hún heyrði ör­væntingar­veinin í hundunum

Kristín Ólafsdóttir skrifar
Erna sést fyrir miðju ásamt Abby, einum hundinum sem brann inni í eldsvoðanum á þriðjudag. Á hinum myndunum sést tjónið á heimilinu og innanstokksmunum vel.
Erna sést fyrir miðju ásamt Abby, einum hundinum sem brann inni í eldsvoðanum á þriðjudag. Á hinum myndunum sést tjónið á heimilinu og innanstokksmunum vel. Samsett

Erna Christiansen, ung kona sem missti sex hunda og aleiguna í eldsvoða í Kópavogi í fyrradag, lýsir hræðilegri geðshræringu og sorg vegna brunans. Hún fylgdist bjargarlaus með heimili sínu brenna og heyrði örvæntingar- og sársaukaveinin í hundunum sex sem brunnu inni. Fjórir hundar Ernu björguðust þó og braggast vel, sem hún kveðst óendanlega þakklát fyrir.

Eldurinn kviknaði á heimili Ernu við Arakór í Kópavogi síðdegis á þriðjudag. Fram hefur komið að eldurinn er talinn hafa kviknað út frá lampa, sem tæknideild lögreglu hefur til rannsóknar. Líkt og áður segir brunnu sex hundar inni, þau Echo, Abby, Mona, Oriana, Ohana og Moli, og þá varð einnig gríðarlegt tjón á heimilinu, líkt og myndir af vettvangi brunans sem fylgja fréttinni sýna.

Hundar Ernu sem ekki náðist að bjarga úr brunanum.Aðsend

Misstu húsið á tíu mínútum

Erna ræktar hunda af tegundinni Russian toy undir merkjum ræktunarinnar Great Icelandic Toy og voru því margir hundar, þrír aðeins sex vikna gamlir, í húsinu þegar eldurinn kom upp.

Erna segir að allt hafi verið með kyrrum kjörum þriðjudaginn örlagaríka. Dagurinn hafi gengið sinn vanagang; um klukkan hálf þrjú síðdegis gaf Erna hundunum sínum að borða og skaust svo með einn þeirra, Lólu, til dýralæknis. En andartaki síðar dundu ósköpin yfir.

Hitinn af eldinum bræddi plastið sem búrin eru gerð úr.Úr einkasafni

„Um fimm mínútum síðar hringir mamma í sjokki, spyr mig hvar ég sé og segir að það sé kviknað í. Ég sný strax við í algjöru sjokki og bruna heim. Þegar heim er komið hefur reykurinn teygt sig á efri hæðina og allt húsið stútfullt af svörtum reyk,“ segir Erna.

„Við misstum húsið okkar á fimm til tíu mínútum. Hvorki mamma né systir mín náðu að fara niður og reyna að slökkva eldinn eða bjarga hundunum.“

Ætlaði að æða inn í reykjarmökkinn

Erna segist hafa ætlað að æða inn í reykskýið sem tók á móti henni þegar hún kom aftur að húsinu en móðir hennar hafi haldið aftur af henni.

„Mamma náði að stoppa mig áður en ég fór inn í brennandi húsið til að reyna að bjarga skælandi, grátandi og öskrandi hundunum mínum. Ég hefði farið inn en það var bara of seint og það var gott að einhver stoppaði mig,“ segir Erna.

Íbúð Ernu er afar illa farin eftir brunann, líkt og sést hér.Úr einkasafni

Hún þurfti því að fylgjast með heimili sínu brenna og hlusta á örvæntingarveinin í hundunum sem þar voru inni á meðan lögregla, slökkvilið og sjúkraliðar reyndu að bjarga því sem bjargað varð. Erna lýsir gríðarlegri geðshræringu og sorg þessar erfiðu mínútur sem þá fóru í hönd.

„Eftir útreikning í hausnum hjá mér, miðað við magn reyks, elds, hita og tíma hafði ég misst allt. Það væri mjög ólíklegt að þessir litlu líkamar myndu lifa þetta af. Ég gargandi, grátandi, öskrandi, dettandi. Og óhljóðin frá hundunum mínum berjast fyrir lífi sínu, kvalafullu öskrin í sex vikna gömlu hvolpunum mínum, gráturinn í stelpunum mínum. Mér fannst eins og enginn ætlaði að hlusta á mig. Horfandi á íbúðina brenna í margar, margar mínútur áður en ég var dregin í burtu, á meðan hundarnir hættu smátt og smátt. Ég var viss um að þetta væri búið,“ segir Erna.

Erna ásamt einum hundinum sem bjargaðist úr brunanum.Úr einkasafni

Finnst lífið hafa verið hrifsað af sér

Svo leið og beið. Erna segir að lögregla hafi fljótlega tjáð henni að ekki hefði náðst að bjarga hvolpunum þremur og einni tíkinni en fjórir hundar hefðu verið fluttir á Dýrapsítalann í Víðidal. Þangað fór Erna ásamt systur sinni.

„Við mætum inn og fáum mjög hlýjar móttökur. Það er útskýrt fyrir mér að þær séu með fjóra hunda hjá sér og allir á lífi. En ég vissi ekki hverjir,“ segir Erna. „Mér leið eins og þetta væri lottó. Hver er á lífi?“

Hundarnir fjórir sem lifðu af, þær Vigdís, Baileys, Imma og Lizzy, braggast vel, að sögn Ernu. Þó þurfti að leggja Immu aftur inn eftir að henni hrakaði í gær en hún er nú komin aftur heim. Erna segir að áfallið, bæði tilfinninga- og efnislegt, sé ólýsanlegt.

„Hundarnir eru líf mitt. Ég lifi fyrir þá. Og lífið var hrifsað að mér. Næstum allt var tekið af mér og ég skilin eftir allslaus, með hálfan haus, brotið hjarta og skurð í sálinni. Íbúðin og allt sem var í henni brann,“ segir Erna.

Allt var í sóti og ösku eftir brunann en sumu náðist að bjarga.Úr einkasafni

Nokkrir hlutir sem hafa mikið tilfinningalegt gildi fyrir Ernu komust þó því sem næst óskaddaðir úr brunanum. Tvær öskukrukkur af gömlum hundum Ernu náðust úr brunarústunum, auk hálsmens sem smíðað var í eftirmynd loppu hunds sem Erna missti í fyrra.

Þá kveðst Erna afar þakklát öllum sem hafa rétt henni hjálparhönd í kjölfar brunans. Þeir séu margir.

„Takk fyrir að bjarga stelpunum mínum slökkviliðið og Dýraspitalinn í Viðidal, og Dýraríkið fyrir að gefa okkur allar nauðsynjavörur fyrir stelpurnar sem eru eftir. Og svo má ekki gleyma Guðfinnu minni, sem hefur staðið við bakið á mér eins og klettur, veitt mér gistingu og hjálp með stelpurnar,“ segir Erna.


Tengdar fréttir

Hundarnir sem björguðust úr brunanum braggast vel

Hundarnir sem björguðust úr bruna í íbúðarhúsi við Akrakór í Kópavogi í gær braggast vel, að því er fram kemur í færslu slökkviliðs höfuðborgarsvæðisins á Facebook í dag.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×