Umboðsmaður Söru: Búið ykkur undir flugeldasýningu á næsta ári

Sara Sigmundsdóttir var ekki lík sjálfri sér á heimsleikunum í ár og það var líka ástæða fyrir því. Umboðsmaður hennar spáir því að hún kom sterk til baka á árinu 2021.

Snorri Barón Jónsson, umboðsmaður Söru, hefur mikla trú á sinni konu fyrir komandi tímabil. Hann mátti ekki segja frá því sem var í gangi hjá henni þegar fólk í CrossFit heiminum kepptist við að gagnrýna frammistöðu hennar á heimsleikunum en getur nú loksins komið fram.

Sara Sigmundsdóttir greindi frá því á dögunum að hún hafi glímt við hormónaskort á heimsleikunum sem hafði mikil áhrif á frammistöðu hennar sem var langt undir væntingum. Sara fékk stóran skurð þegar hún datt á æfingu um vorið og fékk síðan sýkingu í sárið líklega af því að hún gerði allt til að ná Rogue Invitational mótinu.

Þetta allt saman kom í bakið á henni á stærsta móti ársins því Sara var langt frá því að komast í ofurúrslitin um heimsmeistaratitilinn þrátt fyrir að næstum því allir spáðu henni þangað.

Sara hefur ekki haft heppnina með sér á heimsleikunum síðustu ár og þrátt fyrir að vinna The Open þrisvar sinnum á síðustu fjórum árum og vera helsti keppinautur Tiu-Clair Toomey á mörgum mótum tímabilsins, þá hefur hún nú klikkað á þremur heimsleikum í röð.

Sara Sigmundsdóttir var síðast í hóp efstu kvenna á heimsleikunum árið 2017 þegar hún endaði í fjórða sæti. Hún varð þriðja bæði 2015 og 2016.

„Í opnu og hreinskilnu bréfi þá hefur Sara Sigmundsdóttir farið yfir þá hluti sem hún hefur verið að burðast með. Nú þegar sannleikurinn er kominn fram í dagsljósið þá eru líka nokkrir hlutir sem ég vil koma frá mér,“ skrifar Snorri Barón Jónsson, umboðsmaður Söru.

„Það hefur verið krefjandi að standa á hliðarlínunni og vera þögull og rólegur á meðan svo margt fólk hefur verið að koma sitt sérfræðimat. Suma þekki ég persónulega og sumir þeirra eru háttsettir í CrossFit íþróttinni. Enginn þeirra hafði samt hugmynd um það sem var í gangi,“ skrifaði Snorri Barón.

Snorri Barón telur nokkur dæmi þar sem Sara hefur sýnt mikinn keppnisvilja og mikla keppnishörku á ferlinum á stundum þegar flestir væru fyrir löngu búnir að gefast upp. Hún hélt áfram rifbeinsbrotin á heimsleikunum árið 2018 og vann Dubaí Crossfit mótið árið 2017 þrátt fyrir að glíma við matareitrun.

„Þetta er Sara. Þetta er í hennar DNA. Hún er týpan sem mun halda áfram að hlaupa þótt að hún sé fótbrotin á báðum. Við sem vinnum náið með henni þurfum bara að sætta okkur við það þó að það geti verið erfitt. Við áttum okkur á því að svona seigla og tryllt keppnisharka er hennar X-faktor og hefur hjálpað henni að ná svo mörgum markmiðum nú þegar,“ skrifaði Snorri Barón.

Snorri Barón horfir björtum augum á framhaldið hjá Söru Sigmundsdóttur.

„Sara hefur þroskast mikið sem manneskja á þeim fimm árum sem ég hef unnið með henni og hún hefur fundið leiðir til að glíma við veikleika sína, skoða það sem fór úrskeiðis og hvernig hún kemst hjá því að gera sömu mistök aftur. Útkoma síðustu þriggja heimsleika hafa verið vonbrigði en allt vegna mismunandi ástæðna. Allt hafa þetta verið dýrmætur lærdómur og þetta mun verða eldsneyti á eldinn hennar þegar 2021 tímabilið fer af stað,“ skrifaði Snorri Barón og bætti við að lokum:

„Búist við flugeldasýningu,“ skrifaði Snorri Barón en það má sjá allan pistil hans hér fyrir neðan.