Innlent

Take-away listi af kínverskum veitingastað?

Jakob Bjarnar skrifar
Hvað það er sem tengir þessa Íslendinga er okkar að vita en Kínverja að finna út. Listi yfir nöfn þeirra sem lentu á hinum kínverska lista lýsir afar ósamstæðum hópi. Þar er til dæmis að finna nöfn Ríkharðs Daðasonar knattspyrnukappa, Halldóru Mogensen Pírata, Styrmis Gunnarssonar fyrrverandi Moggaritstjóra og Karls Gauta Hjaltasonar Miðflokksmanns.
Hvað það er sem tengir þessa Íslendinga er okkar að vita en Kínverja að finna út. Listi yfir nöfn þeirra sem lentu á hinum kínverska lista lýsir afar ósamstæðum hópi. Þar er til dæmis að finna nöfn Ríkharðs Daðasonar knattspyrnukappa, Halldóru Mogensen Pírata, Styrmis Gunnarssonar fyrrverandi Moggaritstjóra og Karls Gauta Hjaltasonar Miðflokksmanns.

Margir klóra sér nú ákaft í kolli yfir lista yfir þá Íslendinga sem koma fyrir í gagnasafni kínverska fyrirtækisins Zhenhua. Meðan fjölmiðlar kynna þennan lista til sögunnar sem nöfn áhrifafólks í íslensku þjóðfélagi fá aðrir ekkert vit í listann. Sagt er að umræddur gagnaleki hafi vakið mikla at­hygli um heim all­an en talið er að í fór­um kín­verska fyr­ir­tæk­is­ins séu per­sónu­upp­lýs­ing­ar um 2,4 millj­ón­ir manna í nær öll­um ríkj­um heims. En hinn afar ósamstæði listi yfir Íslendingana gefur þeim sem áhuga hafa á þjóðmálum ekki ástæðu til að telja að þarna sé um markvissar njósnir að ræða.

„Sá einhvers staðar að þetta væri take-away listi af kínverskum veitingastað,“ segir Egill Helgason sjónvarpsmaður um þennan lista á Facebook hvar þetta er til umræðu. Og Páll Ásgeir Ásgeirsson rithöfundur og leiðsögumaður segir:

„Sá sem setti saman þennan lista og seldi einhverjum Kínverjum er tvímælalaust viðskiptamaður ársins.“ Hann bætir því við að hugur hans sé hjá þeim starfsmanni sem þarf að fylgjast með þessu fólki, sérstaklega þeim sem eru látnir.

Látinn maður á listanum

Þarna er Páll Ásgeir að vísa til þess að á listanum má finna nafn Harðar Zóphaníassonar ljóðskálds og fyrrverandi skólastjóra í Hafnarfirði. Hörður andaðist í maí árið 2015.  Annar á listanum er Magnús Torfi Ólafsson, fyrrverandi þingmaður Samtaka frjálsyndra og vinstri manna en hann lést árið 1998.

Hörður Zóphaníasson heitinn, ljóðskáld og fyrrverandi skólastjóri, er á lista Kínverjanna.

Hvað Styrmir Gunnarsson fyrrverandi ritstjóri, Halldóra Mogensen þingmaður Pírata, Heiða Kristín Helgadóttir athafnakona og Karl Gauti Hjaltason þingmaður Miðflokksins eiga sameiginlegt, svo dæmi séu nefnd, er gáta sem gæti reynst Kínverjunum erfið viðureignar.

Upplifi höfnunartilfinningu. Ekki njósna Kínverjarnir um mig en mundu þó eftir Haraldi Einarssyni fv. Framsóknarþingmanni sem ég var meira að segja búinn að gleyma að væri til.

Posted by Stefán Pálsson on Þriðjudagur, 29. september 2020

Þorvaldur Sverrisson framkvæmdastjóri og heimspekingur virðist ekki hafa þungar áhyggjur af málinu sem er haft til marks um umfangsmikinn eftirlitsiðnað Kínverja. „Sennilega er leti eitt aðal-karaktereinkenni njósnara.“

Og Karen Kjartansdóttir framkvæmdastjóri Samfylkingarinnar reynir að fá eitthvert vit í listann, segir að samkvæmt klisjunni hugsi Kínverjar víst 100 ár fram í tímann. „Mögulega gæti þessi listi verið í samhengi við eitthvað þá.“

PEP-arar og annað fólk

Stundin hefur fjallað ítarlega um málið og þar kemur meðal annars fram að tæplega 400 Íslendingar séu á þessum leynilegum upplýsingalista kínverska fyrirtækisins Zhenhua, sem lekið hefur út til nokkurra fjölmiðla í heiminum í gegnum bandarískan fræðimann, Christopher Balding, og ástralskt netfyrirtæki. 

„Nöfn 2,5 milljón einstaklinga víða um heima er að finna á listanum. Fyrirtækið sem tók listann saman heitir Zhenhua Data Information Technology er dótturfélag fyrirtækis sem er í eigu kínverska hersins.“

Einungis mun hafa tekist að afrita tíu prósent listans en þar er fólki skipt í þrjá hópa. PEP; fólk sem á að heita pólitískt tengdir, RCA sem eru skyldmenni PEP-arana og svo SIP, fólk sem hefur verið dæmt fyrir lögbrot.

Samkæmt Stundinni eru þessir meðal annarra skilgreindir eru sem PEP á listanum:

Aðalsteinn Guðmundsson (PEP)

Aðalsteinn Leifsson (PEP), ríkissáttasemjari og fyrrverandi stjórnarformaður Fjármálaeftirlitsins.

Auðunn Atlason (PEP), sendiherra Íslands í Finnlandi

Auður Finnbogasdóttir, stjórnarmaður í Íslandsbanka

Ágúst Kristinsson (PEP)

Árni Jóhannsson (PEP)

Ásdís Snævarr (RCA), sendiherra og eiginkona Kjartans Gunnarssonar, fyrrverandi framkvæmdastjóra Sjálfstæðisflokksins. Virðist vera á listanum sem eiginkona Kjartans.

Ástríður Grímsdóttir (PEP) Héraðsdómari við héraðsdóm Suðurlands frá árinu 2006

Birkir Kristinsson (SIP)

Bjarkey Gunnarsdóttir (PEP), þingkona Vinstri grænna

Björg Friðleifsdóttir (Siv Friðleifsdóttir), fyrrverandi þingkona Framsóknarflokksins og fyrrverandi ráðherra.

Björn Guðbjörnsson (PEP)

Borghildur Erlingsdóttir (PEP), lögfræðingur og forstjóri ríkisfyrirtækisins Einkaleyfastofu

Brynhildur Pétursdóttir (PEP), fyrrverandi þingmaður Bjartrar framtíðar og framkvæmdastjóri Neytendasamtakanna.

Danielle Neben (PEP), markaðsstjóri tæknifyrirtækisins Epassi Ísland og sérfræðingur í markaðsmálum í Kína. Epassi á í samstarfi við kínverska samskiptaforritið WeChat sem er vinsælt greiðslumiðlunarapp í Kína.

Einar Þór Bjarnason (PEP), ráðgjafi hjá ráðgjafafyrirtækinu Intellecta og stjórnarmaður í Landsbankanum

Elmar Svavarsson, (SIP) fyrrverandi starfsmaður Glitnis sem er á listanum vegna dóms í efnahagsbrotamálum.

Erlendur Magnússon (PEP), fyrrverandi framkvæmdastjóri hjá Glitni og stjórnarformaður fjármálafyrirtækisins Total Capital Partners

Geir H. Haarde (PEP/SIP), sendiherra Íslands í Bandaríkjunum og fyrrverandi forsætisráðherra sem var dæmdur fyrir vanrækslu í starfi í Landsdómi í kjölfar efnahagshrunsins en var ekki gerð refsing. Geir kemur fyrir tvisvar á listanum. Annars vegar sem pólitískt mikilvægur einstaklingur og hins vegar vegna dómsins í Landsdómsmálinu.

Gísli Magnússon (PEP), ekki vitað

Guðmundur Árnason (PEP), ráðuneytisstjóri í fjármálaráðuneytinu

Gunnar Helgi Hálfdánarson (SEP), fyrrverandi framkvæmdastjóri hjá Landsbanka Íslands, og fyrrverandi stjórnarmaður í honum eftir bankahrunið 2008.

Gunnar Snorri Gunnarsson (PEP), sendiherra Íslands í Kína.

Gylfi Magnússon (PEP), hagfræðingur við Háskóla Íslands og fyrrverandi viðskiptaráðherra

Halldór Kristjánsson (PEP), fyrrverandi bankastjóri Landsbanka Íslands og senior executive vice president hjá fjármálafyrirtækinu Prospect Financial Services í Edmonton í Kanada.

Halldóra Mogensen (PEP), þingkona Pírata

Halli Sigurðsson (PEP)

Hanna Katrín Friðriksson (PEP), þingkona Viðreisnar og þingflokksformaður flokksins

Haraldur Einarsson, þingmaður Framsóknarflokksins

Heiða Helgadóttir (PEP), einn af stofendum Besta flokksins og fyrrverandi stjórnarformaður Bjartrar framtíðar

Helga Sigrún Harðardóttir (PEP), þingkona Framsóknarflokksins á árunum 2008 til 2009

Helga Olrich (RCA), dóttir Tómasar Inga Olrich fyrrverandi ráðherra

Hjörleifur Sveinbjörnsson (RCA), eiginmaður Ingibjargar Sólrúnar Gísladóttur

Hrafn Bragason, fyrrverandi hæstaréttardómari. Var í embætti 1987 til 2007.

Logi Ólafsson, starfsmaður utanríkisráðuneytisins.

Hörður Jónsson, framkvæmdastjóri rekstrarsviðs Íslandspósts og einn lykilstjórnandi ríkisfyrirtækisins

Hörður Zóphaníasson (PEP), fyrrverandi skólastjóri og fulltrúi í kjararáði

Höskuldur Erlingsson (PEP), ekki vitað

Ingibjörg Guðmundsdóttir (PEP), fyrrverandi varaforseti ASÍ

Ingimundur Sigurpálsson, fyrrverandi forstjóri Íslandspósts

Ingþór Eiríksson (PEP) fjársýslustjóri

Jakob Falur Garðarsson (PEP), framkvæmdastjóri Frumtaka -

Jensína Kristín Böðvarsdóttir (PEP), einn af stjórnendum alþjóðlega ráðgjafafyrirtækisins Valcon og fyrrverandi starfsmaður Alvogen, Símans og Landsbankans

Jón Egill Egilsson (PEP), fyrrverandi sendiherra og fyrrverandi ráðuneytisstjóri utanríkisráðuneytisins og núverandi meðlimur í orðunefnd Fálkaorðunnar.

Jón Guðni Ómarsson, framkvæmdastjóri fjármálasviðs hjá Íslandsbanka.

Jón HB. Snorrason (PEP), fyrrverandi aðstoðarlögreglustjóri í Reykjavík og saksóknari hjá embætti ríkissaksóknara

Karl Gauti Hjaltason (PEP), þingmaður Miðflokksins,

Katrín Júlíusdóttir (PEP), fyrrverandi þingkona Samfylkingarinnar og fyrrverandi ráðherra og núverandi framkvæmdastjóri Samtaka fjármálafyrirtækja

Kristinn Gunnarsson (PEP), fyrrverandi þingmaður Framsóknarflokksins

Kristján Andri Stefánsson (PEP), sendiherra Íslands í Brussel

Lilja Einarsdóttir (PEP), bankastjóri Landsbankans

Magnús Torfi Ólafsson (PEP), fyrrverandi þingmaður Samtaka frjálsyndra og vinstri manna sem lést árið 1998. Mynd fylgir af Magnúsi Torfa í gagnagrunninum.

Margrét Hauksdóttir (PEP), forstjóri Þjóðskrár sem er ríkisstofnun

Maríanna Jónasdóttir (PEP), skrifstofustjóri í fjármálaráðuneytinu

Óttar Proppé (PEP), fyrrverandi þingmaður Bjartar framtíðar og ráðherra

Ragnar Kristjánsson (PEP), ekki vitað

Ragnhildur Hjaltadóttir (PEP), ráðuneytisstjóri samgöngu- og sveitastjórnarráðuneytisins og þar á undan ráðuneytisstjóri í innanríkisráðuneytinu

Reynir Vignir (PEP), endurskoðandi og fyrrverandi formaður skilanefndar Straums fjárfestingarbanka.

Ríkharður Daðason (RCA), fjárfestir og sonur Ragnheiðar Ríkharðsdóttur, fyrrverandi þingkonu Sjálfstæðisflokksins

Sari Ohyama (RCA), eiginkona Ragnars Baldurssonar sendiráðsfulltrúa Íslands í Kína.

Sigríður Jóhannesdóttir (PEP), þingmaður Alþýðubandalagsins á árunum 1996 til 2003.

Sigurður Bessason (PEP), fyrrverandi formaður Eflingar og varaforseti ASÍ

Sjöfn Þórðardóttir (PEP), kennari, ráðgjafi og fyrrverandi formaður Landsambands sjálstæðiskvenna.

Sólveig Pétursdóttir (PEP), fyrrverandi þingkona Sjálfstæðisflokksins og fyrrverandi ráðherra

Stefán Skjaldarsson (PEP), fyrrverandi sendiherra Íslands í Kína og núverandi starfandi sendiherra í utanríkisráðuneytinu.

Sveinbjörg Sveinbjörnsdóttir, fyrrverandi borgarfulltrúi Framsóknar og flugvallarvina og fyrrverandi varaþingmaður.

Tryggvi Pálsson (PEP), fyrrverandi forstöðumaður fjármálastöðugleika í Seðlabanka Íslands og fyrrverandi stjórnarformaður Landsbankans.

Þóra Arnórsdóttir (PEP), ritstjóri fréttaskýringarþáttarins Kveiks og fyrrverandi forsetaframbjóðandi

Þórður Bjarni Guðjónsson (PEP), starfsmaður utanríkisráðuneytisins, meðal annars fyrrverandi aðalræðismaður Íslands í Winnipeg.

Þórir Ibsen (PEP), sendiherra

Þórir Skarphéðinsson (PEP), lögfræðingur og fyrrverandi starfsmaður sjávarútvegs- og viðskiptaráðuneytisins



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.