Erlent

Skipuleggjendurnir lofa minni óreiðu næst

Tryggvi Páll Tryggvason skrifar
Kappræðurnar einkenndust af framígripum og óreiðu.
Kappræðurnar einkenndust af framígripum og óreiðu. EPA-EFE/JIM LO SCALZO

Skipuleggjendur kappræðnanna fyrir bandarísku forsetakosningarnar hafa heitið því að breyta skipulagi þeirra svo koma megi í veg fyrir stöðug frammígrip, líkt og gerðist ótt og títt í fyrstu kappræðum kosningabaráttunnar í nótt. Reuters greinir frá. 

Frá fyrstu mínútu einkenndust kappræðurnar í nótt af óreiðu, framígripum og deilum. Donald Trump greip ítrekað fram í fyrir mótframbjóðanda sínum, Joe Biden og stjórnandanum Chris Wallace.

Snemma í kappræðunum virtist Biden vera orðinn þreyttur á þessum framígripum, og sagði hann Trump meðal annars að þegja.

Í frétt Reuters segir að skipuleggjendur muni fínstilla reglurnar fyrir næstu kappræður sem fram fara í Miami í Flórída þann 15. október, með það að markmiði að kappræðurnar verði „hófstilltari“.

Því hefur meðal annars verið velt up að skipuleggjendur muni mögulega leggja til að stjórnandinn geti slökkt á hljóðnema þess frambjóðanda sem grípi stöðugt fram í. Biden sjálfur stakk meðal annars upp á því eftir kappræðurnar. Í frétt AP um málið segir að það sé einmitt á meðal þess sem skipuleggjendur séu að skoða.

Ekkert liggur þó fyrir um það hvernig skipuleggjendurnir hyggjast ná fram markmiðum sínum um hófstilltari kappræður.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.