Erlent

Ná saman um nýja stjórn um 500 dögum eftir kosningar

Atli Ísleifsson skrifar
Hinn 44 ára Alexander De Croo verður næsti forsætisráðherra Belgíu.
Hinn 44 ára Alexander De Croo verður næsti forsætisráðherra Belgíu. EPA

Samkomulag hefur náðst um myndun nýrrar sjö flokka stjórnar í Belgíu, nærri fimm hundruð dögum eða sextán mánuðum eftir að þingkosningar fóru fram í landinu. Alexander De Croo, leiðtogi Flæmska frjálslynda flokksins, verður næsti forsætisráðherra landsins.

Samstarfið hefur verið kallað Vivaldi-bandalagið og samanstendur af flokkum frjálslyndra, sósíalista og græningja úr frönskumælandi hluta landsins annars vegar og flæmskumælandi hlutanum hins vegar, auk hinna flæmskumælandi Kristilegra demókrata. De Croo mun taka við embætti á morgun.

Starfsstjórn hefur stýrt landinu frá kosningum í maí 2019 og hefur hin frönskumælandi Sophie Wilmes gegnt embætti forsætisráðherra síðustu mánuði.

Tilkynnt var um myndun nýrrar stjórnar í morgun eftir maraþonviðræður leiðtoga flokkanna um samsetningu fjárlaga.

Hinn 44 ára De Croo hefur gegnt embætti fjármálaráðherra Belgíu frá árinu 2018. Þá hefur hann áður gegnt embætti þróunarsamvinnumála, aðstoðarforsætisráðherra og lífeyrismálaráðherra.

Þjóðernisflokkurinn Nýja flæmska fylkingin, sem hlaut flest atkvæði í kosningunum, eða 16 prósent, á ekki aðild að nýju stjórninni. Sömu sögu er að segja um  hægriöfgaflokkinn Vlaams Belang sem hlaut 12 prósent atkvæða.

Það er engin nýlunda að langan tíma taki að mynda ríkisstjórn í Belgíu. Þannig tók það 541 að mynda stjórn í landinu eftir þingkosningarnar 2010.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.