Það verða yfirleitt fremur hægir vindar í dag og víða dálitlar skúrir en norðaustan kaldi og slydduél á Ströndum og Vestfjörðum með kvöldinu, að því er segir í hugleiðingum veðurfræðings á vef Veðurstofunnar.
Það er spáð suðlægum áttum á morgun og rigningu á Suðausturlandi, víða annars staðar skúrir en léttir til norðaustanlands.
Það sem eftir lifir vikunnar verður breytilegt veður með vætu í flestum landshlutum en engin aftök að því er séð verður, eins og það er orðað í hugleiðingunum. Milt veður að deginum, en sums staðar vægt frost að næturlagi.
Veðurhorfur á landinu:
Vestlæg eða breytileg átt, 3-8 m/s, en 8-13 með N-ströndinni. Dálitlar skúrir í flestum landshlutum, en norðlægari og slydduél NV til undir kvöld.
Suðlæg átt, 3-10 m/s á morgun, en norðaustan 8-13 á Vestfjörðum. Rigning á SA-landi og skúrir V-til, en annars úrkomulítið. Hiti 1 til 10 stig, hlýjast SA-lands.
Á þriðjudag:
Norðaustan 13-18 m/s NV til á landinu, en annars austlæg átt, 8-15. Rigning í flestum landshlutum, jafn vel slydda á Vestfjörðum, en úrkomulítið NA-lands. Hiti 1 til 9 stig, hlýjast á Suðausturlandi.
Á miðvikudag:
Austlæg eða breytileg átt, 8-15 m/s, en 13-18 á annesjum nyrðra og víða talsverð rigning, en úrkomulítð SV-lands. Snýst í suðvestanátt um kvöldið og rofar til. Hiti 3 til 10 stig, hlýjast á NA-landi.
Á fimmtudag:
Suðlægar áttir, strekkingur vestast, en annars hægara. Skúrir víða um land, en léttskýjað NA til. Hiti víða 2 til 7 stig.
Á föstudag:
Útlit fyrir hæga norðlæga átt og víða bjartviðri, en fremur svalt í veðri.
Á laugardag og sunnudag:
Líklega austanáttir með vætu víða um land og hægt hlýnandi veður.
