Spái ekki í það hvar fólk á heima þegar ég vel byrjunarliðið

Jón Þór Hauksson, landsliðsþjálfari kvenna í knattspyrnu, tekst á við sína stærstu áskorun á þjálfaraferlinum til þessa þegar Ísland mætir Svíþjóð í kvöld.

Svíþjóð vann til bronsverðlauna á HM í Frakklandi í fyrra og er í fimmta sæti heimslistans. Ísland komst ekki á HM en er í 19. sæti heimslistans.

Jón Þór var ráðinn landsliðsþjálfari undir lok árs 2018 og undir hans stjórn hefur Ísland farið nokkuð þægilega í gegnum fyrstu fjóra leikina í undankeppni EM. Nú er komið að stærstu áskoruninni:

„Tilbúin og full tilhlökkunar“

„Algjörlega. Það er mikil tilhlökkun að mæta Svíum og þeir eru auðvitað sigurstranglegri í þessum leik, sem eitt af toppliðunum í fótboltanum. Þetta verður mjög krefjandi verkefni fyrir okkur og erfiður leikur, en að sama skapi erum við tilbúin og full tilhlökkunar,“ sagði Jón Þór.

Íslenska liðið hafði ekki komið saman síðan í mars, vegna kórónuveirufaraldursins, þegar hópurinn hittist í byrjun síðustu viku. Liðið leit hins vegar afar vel út gegn slöku liði Lettlands, í 9-0 sigrinum síðasta fimmtudag. Þar fengu ungir leikmenn á borð við Sveindísi Jane Jónsdóttur, Karólínu Leu Vilhjálmsdóttur og Alexöndru Jóhannsdóttur að láta ljós sitt skína, og gáfu Jóni Þór varla mikið tilefni til að skipta þeim út í dag?

„Sem betur fer er samkeppnin um stöður í íslenska kvennalandsliðinu mikil. Við erum með breiðan hóp og fullt af leikmönnum sem hafa staðið sig frábærlega. Stór hluti af þeim sem komu ekki inn á í Lettlandsleiknum gera stórt tilkall til þess að spila landsleiki og eru svo sannarlega nógu góðar til þess. Við getum spilað á mörgum mönnum sem hafa verið að gera mjög góða hluti, og það eru forréttindi að hafa þannig hóp,“ sagði Jón Þór með pókersvip.

Völdum það lið sem við töldum sterkast gegn Lettum og það gekk mætavel

Jón Þór hefur hvatt íslenska leikmenn til að fara út í atvinnumennsku, í sterkari deildum en þeirri íslensku, og þess vegna kom það einhverjum spánskt fyrir sjónir að sjá leikmenn sem farið hafa út sitja á bekknum gegn Lettlandi. Þannig má nefna Berglindi Björg Þorvaldsdóttur, Söndru Maríu Jessen, Svövu Rós Guðmundsdóttur og fleiri.

Jón Þór segist vissulega vilja að leikmenn spili í sem sterkustum deildum en kveðst ekki velja byrjunarlið sitt út frá því hvar leikmenn spili:

„Þetta er eitthvað sem að við í íslenskri knattspyrnu þurfum að huga að. Við viljum auðvitað fá sem allra flesta í stórar deildir í Evrópu. Við erum auðvitað með marga frábæra leikmenn sem hafa spilað frábærlega í Evrópu, en ég hef talað um að við þurfum mögulega að fá leikmenn fyrr út, þegar þeir eru yngri, í þessar deildir.

Fyrst og fremst erum við hins vegar að skapa ákveðinn liðsramma hér hjá okkur og þetta var það lið sem við ákváðum að væri sterkasta liðið okkar á fimmtudaginn. Ég held að það hafi gengið mætavel – við skoruðum níu mörk og lékum mjög vel. Samkeppnin er hörð og þegar við veljum byrjunarlið Íslands þá spáum við ekki í það hvar fólk á heima eða hvaðan það kemur. Við veljum það lið sem við teljum sterkast í það sinnið. En ég held að það muni alltaf hjálpa íslenskri knattspyrnu til lengri tíma að við höfum fleiri leikmenn sem spila á hæsta stigi, eins og við höfum séð Söru Björk og fleiri gera. Það hlýtur að vera langtímamarkmiðið, til að fara hærra með landsliðið og leikmenn okkar almennt.“