Jóhanna Fjóla skipuð for­stjóri HVE

Svandís Svavarsdóttir heilbrigðisráðherra hefur skipað Jóhönnu Fjólu Jóhannesdóttur forstjóra Heilbrigðisstofnunar Vesturlands til næstu fimm ára.

Í tilkynningu á vef heilbrigðisráðuneytisins segir að Jóhanna Fjóla hafi gengt embætti forstjóra stofnunarinnar um skeið og starfað hjá stofnuninni frá því að hún var sett á fót. Hún tók við sem settur forstjóri eftir að Guðjón S. Brjánsson tók sæti sem þingmaður fyrir Samfylkinguna árið 2017.

„Hún hefur gegnt stöðu framkvæmdastjóra hjúkrunar og rekstrar og starfað sem verkefnastjóri þróunar- og gæðamála. Á árunum 2000 – 2009 var Jóhanna Fjóla verkefnastjóri hjúkrunar en fyrir þann tíma starfaði hún við Sjúkrahúsið á Akranesi þar sem hún var m.a. hjúkrunarforstjóri um eins árs skeið,“ segir í tilkynningunni.

Einnig segir að ákvörðun ráðherra um skipun hennar í embættið hafi verið tekin að undangengnu mati lögskipaðrar hæfnisnefndar sem metur hæfni umsækjenda um stöður forstjóra heilbrigðisstofnana.