Innlent

Segist ekki hafa mátt taka á­kvarðanir án leyfis og lýsir „skrýtnu“ sím­tali frá Noregi

Kristín Ólafsdóttir skrifar
Guðmundur Gunnarsson, fyrrverandi bæjarstjóri Ísafjarðarbæjar.
Guðmundur Gunnarsson, fyrrverandi bæjarstjóri Ísafjarðarbæjar. Vísir/vilhelm

Guðmundur Gunnarsson, fyrrverandi bæjarstjóri Ísafjarðarbæjar, lýsir meirihlutanum í bæjarstjórn sem „plöntunni í Litlu hryllingsbúðinni“; aldrei ánægð og fær aldrei nóg. Þá segir hann ljóst að bæjarstjórn hafi ekki verið að leita að stjórnanda heldur strengjabrúðu en viðurkennir að hann hefði ekki átt að missa stjórn á skapi sínu á bæjarstjórnarfundi í janúar. Þetta kemur fram í viðtali Mannlífs við Guðmund sem birtist í morgun.

Guðmundur lét af störfum sem bæjarstjóri í lok janúar. Stuttur aðdragandi var að starfslokunum og síðar kom í ljós að þau voru lituð deilum Guðmundar og meirihlutans í bæjarstjórn Ísafjarðarbæjar, sem skipaður er fulltrúum Sjálfstæðisflokks og Framsóknar. Þá greindi Guðmundur frá því í þessum mánuði að hann og fjölskylda hans hygðist flytja frá Ísafirði. Þeim liði ekki vel og teldu sig ekki velkomin í samfélaginu.

Afarkostir sem hann myndi aldrei sætta sig við

Guðmundur lýsir nú bæjarstjóratíð sinni og samskiptum við fólkið í Ísafjarðarbæ í samtali við Mannlíf. Þá ræðir hann sérstaklega samstarfið við bæjarstjórn Ísafjarðar, sem hann segir hafa verið erfitt.

Þannig hafi honum verið settir afarkostir um samskipti sem hann myndi „aldrei sætta sig við, ekki í neinu starfi“. Honum hafi verið gert ljóst að hann ætti engar ákvarðanir að taka, ekki hringja símtöl eða fara á fundi nema með leyfi og samþykki meirihlutans, nánar tiltekið Daníels Jakobssonar, oddvita Sjálfstæðisflokksins hjá Ísafjarðarbæ og formanns bæjarráðs.

„Ég sá þá að það var ekki verið að leita að stjórnanda, það var verið að leita að strengjabrúðu,“ segir Guðmundur í samtali við Mannlíf. Þá lýsir hann því að símtal frá Daníel, sem staddur var í Noregi, í desember síðastliðnum sitji mest í honum þegar hann horfir yfir bæjarstjóratíð sína.

„Hann endaði símtalið á því að segja svona í framhjáhlaupi: „Svo kem ég bara heim og tek af þér djobbið.“ Ég man að mér fannst þetta furðulegt og taktlaust og skrýtið. Hver segir svona í gríni eða alvöru? Það fyrsta sem ég gerði var að hringja í konuna mína og spyrja hana hvort ég brygðist of hart við. Hverju ertu mögulega að koma áleiðis? En eftir á að að hyggja skil ég samhengið,“ segir Guðmundur í samtali við Mannlíf.

Frá Ísafirði þar sem nýr bæjarstjóri tók við fyrr í mánuðinum. vísir/egill

Átakafundir í bæjarstjórn

Guðmundur lýsir einnig bæjarstjórnarfundinum sem haldinn var hinn 17. janúar, þar sem kom til átaka milli hans og meirihlutans. Þá voru liðnir þrír dagar frá því að snjóflóðin féllu á Flateyri og Suðureyri.

Guðmundur segir að gagnrýnin sem hann fékk á fundinum, um að ekki hefði verið gert nóg í kjölfar snjóflóðanna, hafi verið erfið. Þá gengst hann við því að hafa vissulega gert mistök á fundinum, fokið hafi í hann, hann skellt aftur tölvunni og rokið út.

Þá lýsir Guðmundur meirihlutanum sem „plöntunni í Litlu hryllingsbúðinni“, sem fær aldrei nóg og er aldrei ánægð.

„Hún staldrar aldrei við og er södd, hún vill bara meira og meira að borða og svo vex hún og vex og vill meira og meira að borða og vex og vex … og það getur aldrei endað nema með ósköpum.“

Þetta hefði einnig verið upplifun hans þegar hann mætti á sáttafund 24. janúar, og hann kveðst hafa gert grein fyrir því á fundinum. Sömu helgi var tilkynnt um starfslok hans hjá bænum.

Á fundinum hafi talsmenn meirihlutans jafnframt lýst yfir óánægju með Guðmund og störf hans. Þá hafi hann jafnframt fengið staðfest að enginn stóð með honum. Birgir Gunnarsson, fyrrverandi forstjóri Reykjalundar, var að endingu ráðinn bæjarstjóri og tók við af Guðmundi nú í janúar.

Viðtal Mannlífs við Guðmund í heild.


Tengdar fréttir

„Ég er örugglega frekur karl“

Daníel Jakobsson, oddviti Sjálfstæðisflokksins á Ísafirði, segir að eftirsjá verði af Guðmundi Gunnarssyni, fyrrverandi bæjarstjóra, og fjölskyldu hans á Ísafirði. Vilji fólk hins vegar ekki búa á svæðinu þá eigi það að fara í friði.

Upplifa fantabrögð og flýja Ísafjörð

Guðmundur Gunnarsson, fyrrvernadi bæjarstjóri á Ísafirði sem lét af störfum í janúar, segir ekkert annað í stöðunni fyrir sig og fjölskyldu sína en að flytja úr bænum. Þetta segir hann í færslu á Facebook sem sjá má að neðan.

Ísafjarðarbær missir annan bæjarstjóra sinn á einni viku

Byggðarráð Borgarbyggðar hefur lagt til að gengið verði til samninga við Þórdísi Sif Sigurðardóttur um starf sveitarstjóra Borgarbyggðar og verður sú ákvörðun lögð fyrir sveitarstjórn þann 13. febrúar næstkomandi. Fimmtán sóttu um starfið.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.