Innlent

Umstang að skrapa saman átta milljónum í reiðufé

Margrét Helga Erlingsdóttir skrifar
Björgólfur Jóhannsson, starfandi forstjóri Samherja.
Björgólfur Jóhannsson, starfandi forstjóri Samherja. Vísir/vilhelm

Lögregluyfirvöld í Namibíu hafa kyrrsett á ný togarann Heinaste. Björgólfur Jóhansson, settur forstjóri Samherja, telur kyrrsetninguna ekki standast lög og hyggst láta reyna á lögmæti hennar fyrir namibískum dómstólum. Þetta kom fram í hádegisfréttum Bylgjunnar.

Arngrímur Brynjólfsson, skipstjóri Heinaste, þurfti að reiða fram átta milljónir króna í sekt fyrir að hafa stundað ólöglegar veiðar í Namibíu. Hann fékk loks vegabréf sitt í hendurnar eftir að namibískur dómari lagði hald á það. Björgólfur segir að Arngrímur sé kominn til Íslands, hann hefði reyndar flogið hingað til lands síðastliðinn fimmtudag. Björgólfur segir Arngrím frelsinu feginn.

„Þetta var í raun bara þannig að hann hafði í raun ekki vegabréf þannig að hann gat ekki ferðast en það var ekkert þannig að hann væri undir eftirliti endalaust, held ég að ég megi segja. Sektin var borguð og var gengið frá því bara í réttarsalnum en eins og fram hefur komið þurftum við að reiða það fram í reiðufé í réttinum. Það var dálítið umstang að safna seðlum.“

Björgólfur segir að lögreglan hefði kyrrsett Heinaste á ný þvert á afstöðu dómstóla og að hans mati standist hún ekki namibísk lög.

„Þegar Arngríms-málið svokallaða er tekið fyrir er það úrskurðað þannig að það séu ekki forsendur fyrir kyrrsetningu á skipinu og við auðvitað fögnuðum því og töldum það rétta niðurstöðu og héldum áfram að vinna í þeim málum sem lúta að því að koma skipinu til veiða og atvinnu fyrir sjómenn á svæðinu. Lögreglan gerði ekki það sem dómarinn úrskurðaði; það er að afhenda skjöl skipsins sem þeir reyndar tóku. Sú framkvæmd var ekki lögleg að okkar mati,“ segir Björgólfur.

Arngrímur Brynjólfsson skipstjóri leiddur fyrir dómara. Myndin er úr safni. Namibian Broadcasting Corporation

Björgólfur segir að rökstuðningurinn í málinu sé sá að uppi sé rökstuddur grunur lögreglu um að það sé ætlan Samherja að sigla skipinu frá Namibíu og koma því undan.

„Það liggur fyrir að það var og hefur aldrei verið meiningin.“

Björgólfur segir að kyrrsetningin muni ekki koma til með að hafa stórvægileg áhrif á rekstur Samherja.

„Það er náttúrulega ljóst að svona fjárfesting eins og eitt stykki skip sem er ekki að afla tekna þá er engin afkoma af því og einfaldlega bara kostnaður þannig að áhrifin eru einhver en þau eru ekki þannig að hún hafi mikil áhrif endilega á rekstur Samherja. Eignarhaldið á skipinu er í félagi sem við eigum reyndar meirihluta í. Rekstrarfélagið um skipið - þar erum við í minnihlutaeigu þannig að þetta hefur einhver áhrif en þau eru ekkert stórkostleg fyrir félagið. Það er vissulega bagalegt að vera með svona öflugt atvinnutæki og hafa ekki möguleika á að nýta það til tekjuöflunar.“

Gætuð þið hugsað ykkur að láta reyna á þetta fyrir dómstólum?

„Við munum klárlega gera það, já. Það er í vinnslu.“


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.