Innlent

Undir­búa það sem þeir vildu ekki þurfa að undir­búa

Sylvía Hall skrifar
Til stóð að lengja opnunartíma skemmtistaða til miðnættis eftir verslunarmannahelgi. Þeim áformum hefur nú verið frestað til að minnsta kosti 18. ágúst.
Til stóð að lengja opnunartíma skemmtistaða til miðnættis eftir verslunarmannahelgi. Þeim áformum hefur nú verið frestað til að minnsta kosti 18. ágúst. Vísir/Vilhelm

Arnar Gíslason bareigandi segir fjölgun smita slæmar fréttir fyrir rekstraraðila, fari það svo að gripið verði til harðari aðgerða á ný. Arnar rekur meðal annars skemmtistaðina Lebowski, Kalda Bar og Irishman Pub og segir hann varasjóðina vera að tæmast eftir að skemmtistöðum var gert að loka í vor.

Almannavarnir og sóttvarnayfirvöld funduðu í dag með heilbrigðisráðherra þar sem farið var yfir stöðu mála. Í ljósi þeirra innanlandssmita sem hafa komið upp undanfarna daga gæti þurft að taka skref aftur; lækka hámarksfjölda við samkomur og taka upp hina svokölluðu tveggja metra reglu á ný.

„Við þurfum einhvern veginn alltaf að bíða og bíða og verðum síðastir til þess að fá að reka fyrirtækin okkar. Þetta rífur bara enn meira í og nú þarf maður bara að fara að undirbúa eitthvað sem maður var að vona að þurfa aldrei að undirbúa,“ sagði Arnar í viðtali við Reykjavík síðdegis í dag.

Til stóð að lengja opnunartíma skemmti- og veitingastaða til miðnættis eftir verslunarmannahelgi, en þeir hafa mátt vera opnir til klukkan 23 undanfarna mánuði. Þeim áformum var slegið á frest eftir að ný innanlandssmit komu upp. Nú er jafnvel útlit fyrir að von sé á frekari takmörkunum fremur en tilslökunum en heilbrigðisyfirvöld funda aftur á morgun.

Arnar segir það slæmar fréttir fyrir rekstraraðila ef grípa þurfi til harðari aðgerða. Það hafi verið þungt högg að þurfa að loka stöðunum í vor og gríðarlegt tekjutap fylgi því að þurfa að loka klukkan 23. Það bitni einnig á starfsfólki, enda getur það ekki unnið fulla vinnu og þá sé ekki mikið sparifé eftir.

„Maður var búinn að gera það undanfarin ár að búa sig undir ýmislegt og eiga smá varasjóði, en það er búið að ganga helvíti vel á þá.“

Fámenni í miðbæ Reykjavíkur á föstudagskvöldi í samkomubanni.Vísir/Vilhelm

Engin smit þó það sé „troðið til ellefu“ 

Vegna styttri opnunartíma í sumar hafa Íslendingar lagt það í vana sinn að fara fyrr í bæinn og þá fyrr heim. Arnar segir það vissulega rétt að landsmenn hafi lagað sig að breyttum opnunartíma en það sé þó alltaf tekjutap að geta ekki haft opið jafn lengi og leyfi staðarins kveður á um.

„Eins og á Lebowski bar, við erum með leyfi til hálf fimm og erum að missa fimm og hálfan klukkutíma af troðfullum stað. Það er gríðarlegt tekjutjón,“ segir Arnar og bætir við að sumarið sé tíminn þar sem staðirnir nái að safna í sína sjóði.

„Sumartíminn er tíminn sem þessir staðir hlaða sig upp fyrir veturinn. Núna förum við inn í þennan vetur svolítið blindir. Við erum ekki búnir að ná að safna neinu.“

Hann gagnrýnir harðlega að tilslakanir á reglum um opnunartíma skemmtistaða hafi ekki komið fyrr. Í töluverðan tíma hafi nánast verið engin virk smit hér á landi og því hafi mátt lengja opnunartímann til eitt og þá frekar stíga skref til baka núna.

„Auðvitað ber hver ábyrgð á sjálfum sér og það hefur kannski sýnt sig líka að það hafa engin smit borist á skemmtistöðum og börum þó það sé troðið til ellefu.“


Tengdar fréttir

Skoða hertar aðgerðir og boða frekari skimun vegna fjölgunar smita

Til umræðu er nú að herða sóttvarnaaðgerðir innanlands og hugsanlega á landamærunum vegna nýrra kórónuveirusmita frá mismunandi uppsprettum undanfarna daga, að sögn staðgengils sóttvarnalæknis. Frekari skimun fyrir veirunni hefst á næstu dögum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.