Lífið

Stafrænn gagnagrunnur í vefnaði opnaður formlega á HönnunarMars

Sylvía Rut Sigfúsdóttir skrifar
Lilja Dögg Alfreðsdóttir Mennta- og menningarmálaráðherra opnar hér gagnagrunninn í vefnaði
Lilja Dögg Alfreðsdóttir Mennta- og menningarmálaráðherra opnar hér gagnagrunninn í vefnaði Aðsend mynd

Lilja Dögg Alfreðsdóttir mennta og menningarmálaráðherra opnaði á HönnunarMars nýjan stafrænan gagnagrunn í vefnaði. Gagnagrunnurinn er á vegum Textílmiðstöðvar Íslands, og fór formlega opnunin fram á sýningunni Hefðbundin munstur í stafrænni framtíð. 

„Verkefnið felur í sér skrásetningu og ljósmyndun frumgagna vefnaðarmunstra, uppskrifta og vefnaðarprufa sem varðveitt eru í Kvennaskólanum á Blönduós. Þessi stafrænu gögn eru nú orðin að gagnagrunni í vefnaði sem er aðgengilegur á heimasíðu Textílmiðstöðvar Íslands,“ segir Ragnheiður Björk Þórsdóttir verkefnastjóri verkefnisins í samtali við Vísi. Aðstoðarmenn hennar eru Guðbjörg Þóra Stefánsdóttir og Cornelia Theimar Gardella.

Verkefnið felur í sér skrásetningu og ljósmyndun frumgagna vefnaðarmunstra, uppskrifta og vefnaðarprufaAðsend mynd

Á sýningu Textílmiðstöðvar má sjá stafrænan vefnað sem allur er unnin út frá munstrum í þessum gagnagrunni.

„Textíl- og fatahönnun sprettur af gamalli og sterkri arfleifð á Íslandi sem stenst mjög vel alþjóðlega samkeppni. Ferðalag mitt um Hönnunarmars hófst að þessu sinni á sýningunni Hefðbundin munstur í starfrænni framtíð. Textílmiðstöð Íslands sinnir framsækinni alþjóðlegri starfsemi í rannsóknum og þróun á sviði textíliðnaðar svo eftir er tekið út fyrir landsteinana. Það er aðdáunarvert hvað við eigum framúrskarandi fatahönnuði og skartgripahönnuði á Íslandi,“ sagði Lilja Dögg í samtali við Miðstöð hönnunar og arkitektúrs. Þar setti hún saman sína dagskrá fyrir HönnunarMars í ár undir yfirskriftinni Minn HönnunarMars.

„Hönnun og arkitektúr snerta öll svið samfélags og atvinnulífs. Áskoranir þjóða heims eru stærri en nokkru sinni og þarf hugvit og sköpunarkraft til að takast á við þær og þróa skapandi lausnir og tækifæri framtíðar. Í öllum því skapandi og öfluga fólki sem starfar við þessar greinar býr hugvit og kraftur sem mun skipta sköpum fyrir jákvæða framtíðarþróun samfélags og efnahagslífs á Íslandi. Hönnunarmars hefur í meira en áratug verið boðberi bjartari tíma og það á betur við nú en nokkru sinni fyrr. Ég hlakka alltaf til hátíðarinnar og hvet alla til að mæta,“ sagði Lilja. Hennar dagskrá má finna á vef Miðstöðvar hönnunar og arkitektúrs.

Frá opnunarviðburðinum.Aðsend mynd

Hefðbundin munstur í stafrænni framtíð og Rannís verkefnið hjá Textílmiðstöð Íslands á Blönduósi er sýnt á Hönnunarmars 2020 að Hverfisgötu 82. ,,Að byggja stafræna textílbrú til framtíðar” eða ,,Bridging Textiles to the Digital Future" er rannsóknaverkefni Textílmiðstöðvar Íslands styrkt af Tækniþróunarsjóði Rannís. Sýningin er opnin alla helgina frá 12 til 17. 

HönnunarMars 2020 átti að fara fram í lok marsmánaðar eins og undanfarin ellefu ár, en vegna Covid-19 faraldursins var hátíðinni frestað til 24.-28. júní. Á hátíðinni leiðir framsækin hönnun og nýjungar saman sýnendur og gesti.

HönnunarMars fer fram með breyttu sniði í ár en tugir hönnuða taka þátt og allir ættu að geta fundið eitthvað við sitt hæfi. Nánar verður fjallað um hátíðina hér á Vísi næstu daga. Einhverjir viðburðir eru opnir lengur en þessa fimm daga og nánar má lesa um dagskránna á vef HönnunarMars.


Tengdar fréttir

Verðlaunasýningar á Hafnartorgi vöktu athygli

Félag íslenskra teiknara opnaði tvær alþjóðlegar verðlaunasýningar á Hafnartorgi í tilefni af HönnunarMars 2020. Um er að ræða farandsýningu Art Directors Club of Europe þar sem verðlaunuð verk víðsvegar að úr Evrópu verða til sýnis og Tolerance Project listamannsins Mirko Ilic.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.