Telja lægð í rekstri í ferðaþjónustu verða djúpa og langvarandi

Andri Eysteinsson skrifar 17. apríl 2020 18:35

Lítil sem engin umferð er um Keflavíkurflugvöll vegna faraldursins. Vísir/Vilhelm

Í nýrri skýrslu KPMG, Ferðamálastofu og Stjórnstöðvar ferðamála kemur fram að miklar líkur séu á að rekstarlægðin sem faraldur kórónuveirunnar hefur valdið í ferðaþjónustu Íslands verði djúp og langvarandi.

Í skýrslunni sem ber heitið Áhrif COVID-19 á rekstur ferðaþjónustufyrirtækja segir að lægðin geti varið næstu tvö árin. „Staða fyrirtækja í ferðaþjónustu var almennt veikari en í öðrum meginatvinnugreinum. Hins vegar verða neikvæð efnahagsleg áhrif faraldursins mest á þessa atvinnugrein og mun hún illa standast álagið að óbreyttu,“ segir í tilkynningu.

Í skýrslunni segir að ekki sé enn vitað hversu djúp lægðin geti orðið. Ekki sé raunhæft að gera ráð fyrir eðlilegu ástandi fyrr en bóluefni eða önnur lækning við sjúkdómnum hefur verið þróuð.

„Mikil fjárfesting og lág arðsemi hefur kallað á verulega lántöku í greininni. Skv. tölum seðlabankans hækkuðu skuldir greinarinnar við viðskiptabankana þrjá um 84% frá ársbyrjun 2016 til ársloka 2019 á meðan tekjur uxu um 3%. Heildarskuldir hennar eru nú metnar um 300 ma.kr. en tekjufall næstu mánuði – á háönn ársins – nánast algert,“ segir í tilkynningu vegna skýrslunnar.

Ferðamennska á Íslandi Faraldur kórónuveiru (COVID-19)

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.