Lífið samstarf

Þelamerkurskóli tekur brenniboltaáskorun UMFÍ með trompi

UMFÍ
Áskorun tekið! Nær allir nemendur Þelemerkurskóla í Hörgársveit tóku áskorun UMFÍ um að keppa í brennibolta í frímínútum út vikuna.
Áskorun tekið! Nær allir nemendur Þelemerkurskóla í Hörgársveit tóku áskorun UMFÍ um að keppa í brennibolta í frímínútum út vikuna.

Þelamerkurskóli í Hörgársveit tekur þátt í Hreyfiviku UMFÍ af fullum krafti. Hreyfivikan hófst í dag og gengur út á að hvetja landsmenn til þess að hreyfa sig á hverjum degi. Allir grunnskólar landsins fengu sérstaka brenniboltaáskorun sem krakkarnir í Þelamerkurskóla ætla að taka með trompi.

Ragna Baldvinsdóttir íþróttakennari í Þelamerkurskóla.

„Það eru 65 nemendur í skólanum í heildina, 1. til 10. bekkur og yfir 50 krakkar skráðu sig í brenniboltann. Það er býsna gott hlutfall,“ segir Ragna Baldvinsdóttir, íþróttakennari við Þelamerkurskóla og fulltrúi heilsueflingarnefndar við skólann. Hún segir áherslu lagða á heilbrigða hreyfingu í skólastarfinu yfirleitt og ávallt sé bryddað upp á einhverju hressilegu í Hreyfivikunni. Brenniboltaáskorunin hafi þó verið sérstaklega hvetjandi.

„Undanfarin ár höfum við alltaf gert eitthvað hér í skólanum þegar Hreyfivikan stendur yfir en ekki skráð okkur sérstaklega inn. Brenniboltaáskorunin kveikti áhugann að skrá þátttökuna. UMFÍ stendur vel að þessu og Sabína, verkefnastjóri Hreyfivikunnar hafði beint samband við skólana,“ segir Ragna. „Við skiptum bekkjunum upp í átta lið sem keppa á móti hvert öðru í frímínútum. Svo endum við vikuna á því að 10. bekkur skorar á kennarana í brennibolta.“

Fleira munu krakkarnir í skólanum gera í tilefni Hreyfivikunnar meðal annars dansa og ganga á fjöll.

Búið er að stika 400 metra hring á lóð skólans og ganga nemendur fjóra hringi að lágmarki í upphafi dags.

„Það er svo gott að standa upp frá bókunum og dansa og þessa vikuna munu kennararnir brjóta upp kennslustundirnar hjá sér með dansæfingum. Við höfum valið tvö lög sem krakkarnir læra dans við og á föstudaginn munu allir nemendur dansa úti, í vonandi góðu veðri. Á síðasta ári var mikill metnaður í krökkunum að læra sporin og við reiknum með mikilli danssýningu á föstudaginn. Þá innleiddum við Míluna, hugmynd sem á upptök sín í Skotlandi, en markmiðið með Mílunni er að efla andlega og líkamlega heilsu nemenda og starfsfólks. Búið er að stika 400 metra hring við skólann og eru gengnir að lágmarki fjórir hringir í einu í upphafi hvers dags.  Allur skólinn tekur þátt í Mílunni. 9. og 10. bekkur mun einnig ganga á fjall í sveitinni og ýmislegt fleira,“ segir Ragna.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.