„Ég er að fara að taka þetta“

Guðmundur Franklín Jónsson athafnamaður og forsetaframbjóðandi stendur í ströngu við að koma heim og saman öllum þeim undirskriftarlistum sem hann hefur unnið að hörðum höndum við vegna forsetaframboðs síns. Vísir náði tali af honum þar sem hann var önnum kafinn við að kynna framboð sitt í Borgarnesi. Þar var honum tekið vel, að sögn.

Guðmundur segist erfitt að setja fingur á það nákvæmlega hversu margar undirskriftir þær eru sem komnar eru því stöðugt bætist við.

Þær séu nú rúmlega tvö þúsund. Guðmundur er með sínar undirskriftir á blöðum. Svo lítur hann á hinar rafrænu undirskriftir sem boðið var uppá sem bónus. Á miðnætti í kvöld verður lokað fyrir þær.

Bjartsýnn á sigur í kosningunum

Guðmundur Franklín segist ekki hafa hugmynd um hversu margir muni bjóða sig fram þegar hið flókna ferli sem snýst um að skila tilskyldum fjölda undirskrifta í alla fjórðungana.

„Þar sem ég hef skilað inn þá hef ég bara séð Guðna-fólk. Hann sendir fólkið sitt fyrir sig, ekki séð hann sjálfan. Ég geri þetta sjálfur, mér finnst það kurteisara þegar litið er til þessa Covids og þessa kerfis alls. Hversu ruglingslegt það er,“ segir frambjóðandinn. Hann segist bara vona að þeir verði sem flestir.

„Ég er að skora Guðna á hólm og kannski réttast að hann svari því. Ég hef ekki hugmynd um hvernig öðrum gengur með undirskriftirnar. Ég sá það bara í fréttum hjá ykkur að Axel Pétur, gúrúinn hjá gáfumennunum í Harmageddon, hafi tilkynnt um að þetta væri komið rafrænt hjá sér í gær þannig að ég veit ekkert meira.“

Og enn vænkaðist svo hagur Guðmundar í dag þegar Kristján Örn Elíasson, sem hafði lýst yfir því að hann vildi bjóða sig fram til embættis forseta Íslands, hætti við framboð sitt. Og lýsti jafnframt yfir stuðningi við Guðmund Franklín.

„Ég er mjög vongóður. Finn fyrir gríðarlegum byr,“ segir Guðmundur Franklín spurður hvernig þetta leggist í hann.

„Það er mikil undiralda í þjóðfélaginu og fólk upp til hópa er sammála mér í flestum málum, ef ekki öllum. Ég er hefðbundinn frambjóðandi, mjög. Íslenskur, venjulegur kall sem er í framboði. Íslenskur alþýðumaður.“

Blæs á raddir um kostnað vegna framboðsins

Var þetta ekki eitt af slagorðum Ólafs Ragnars Grímssonar fyrrverandi forseta; strákur að vestan?

„Það er þá ekki leiðum að líkjast. Má segja að ég sé strákur að vestan, Ingjaldssandi við Önundarfjörð og úr Múlakoti í Fljótshlíðinni. Tveir fagrir staðir.“

Guðmundur Franklín er hagsýnn maður og fylgist vel með. Hann hefur því vart farið varhluta af gagnrýni sem snýr að því að hann sé með framboði sínu að sóa 400 milljónum, eða því sem áætlað er að kosningarnar muni kosta ríkið?

„Ég blæs á svoleiðis bull. Núverandi forseti er búinn að kosta okkur tugi milljarða og framtíðarmúsíkin er ekki fögur með sínum orkupökkum. Lýðræðið er mörg þúsund ára gamalt, byrjaði í Grikklandi og ég bendi sömu mönnum sem halda þessu fram að auðvitað vilji þeir heldur engar alþingiskosningar og hafa sama systemið og hefur verið. Þeir vilja kínverskt fyrirkomulag.“

Fráskilinn forsetaframbjóðandi

Guðmundur lýsir sér sem hefðbundnum frambjóðanda en hefðbundnir frambjóðendur eru vanir að tromma upp með fjölskyldur sínar þegar þeir eru á framboðsbuxum?

„Ég er fráskilinn fyrir nokkrum árum með þrjú uppkomin börn. Fráskilinn eins og forsetinn og svo margir í þjóðfélaginu. Ég er á lausu. Ég á enga kærustu.“

Kosið verður 27. júlí. Það leggst vel í Guðmund Franklín, sem áður segir:

„Ég er að fara að taka þetta. Guðni [Th. Jóhannesson forseti Íslands] hefði kannski átt að setja orkupakka 3 í þjóðaratkvæðagreiðslu og þá hefði ég ef til vill ekki verið að standa í þessu.“