Golf

Valdís tekjulaus í marga mánuði: „Fell á milli alls staðar í kerfinu“

Sindri Sverrisson skrifar
Valdís Þóra Jónsdóttir spilar í Mosfellsbæ um helgina en getur ekki aflað sér verðlaunafjár erlendis þessar vikurnar.
Valdís Þóra Jónsdóttir spilar í Mosfellsbæ um helgina en getur ekki aflað sér verðlaunafjár erlendis þessar vikurnar. MYND/STÖÐ 2 SPORT

„Það er erfitt að vera tekjulaus í marga mánuði, og ég sé fram á 5-7 mánuði án tekna núna,“ segir Valdís Þóra Jónsdóttir, atvinnukylfingur, sem vegna kórónuveirufaraldursins getur ekki leikið á móti erlendis eins og hún ætlaði sér.

Valdís segir að öfugt við marga aðra Íslendinga virðist hún ekki geta fengið neinar bætur vegna þeirra tekna sem hún missi af.

„Ég átti að vera í Frakklandi að spila í síðustu viku og ætti að vera á Spáni núna, og hefði í raun ekkert átt að koma heim fyrr en um miðjan júní. En það er búið að fresta öllu í maí, júní og júlí þannig að maður er bara hérna heima, með engan séns á tekjum og fellur á milli alls staðar í kerfinu. Þetta er búið að setja lífið mikið úr skorðum en maður veit að það eru stærri hlutir sem skipta máli núna og ber virðingu fyrir því,“ sagði Valdís við Svövu Kristínu Gretarsdóttur í Sportpakkanum.

„Ég myndi vilja sjá betri stuðning við einstaklingsíþróttir. Við eigum ekki rétt á neinu núna, erum algjörlega réttindalaus í öllum kerfum á Íslandi. Við eigum ekki rétt á atvinnuleysisbótum, augljóslega komumst við ekki á hlutabótaleið því við erum ekki tæknilega séð fyrirtæki, þannig að ég myndi vilja sjá meira öryggisnet fyrir íþróttamenn sem eru að keppa fyrir Ísland og eru að reyna að koma Íslandi betur á kortið í öllum íþróttum. Það væri fínt að fá stuðning frá ríkinu þegar eitthvað svona kemur upp á, og líka þegar ekkert svona er í gangi,“ segir Valdís. Alls kostar óvíst er hvenær hún mun geta keppt að nýju á Evrópumótaröðinni eða öðrum mótum erlendis:

„Það eru mót enn þá á dagskrá í ágúst og þau eiga að vera í Bretlandi. Eins og ástandið er þar núna þá er maður bara í biðstöðu. Maður veit ekkert hvort maður fer út þá eða ekki. Vonandi kemst þetta af stað í haust en þangað til bíður maður þolinmóður eftir nýjum fréttum. Maður fær nýjar fréttir vikulega,“ segir Valdís sem keppir í Mosfellsbæ nú um helgina á ÍSAM-mótinu.

Klippa: Sportpakkinn - Valdís segir íþróttafólk þurfa betri stuðning

Tengdar fréttir

Sterkasta golfmót allra tíma hér landi?

Skærustu stjörnur golfíþróttarinnar hér á landi verða á ferðinni í Mosfellsbæ á laugardag og sunnudag þegar ÍSAM-mótið fer fram. Þar gæti verið um að ræða fyrsta mótið sem telur inn á heimslista áhugakylfinga frá því að kórónuveirufaraldurinn setti allt íþróttalífið úr skorðum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.