Nuddari sakfelldur fyrir nauðgun

Nuddari var í dag sakfelldur í Héraðsdómi Reykjavíkur fyrir að reka fingur sinn inn í leggöng konu við beitingu framúrstefnulegrar nuddaðferðar. Nuddarinn var dæmdur í tveggja ára fangelsi.

Konan sem um ræðir leitaði til nuddarans Sverris Hjaltasonar vegna verkja í mjóbaki. Fyrst í stað var um eðlilegt nudd að ræða þar sem konan lá á maganum og maðurinn nuddaði á henni bakið. Nuddið tók þó nokkuð óvænta stefnu þegar nuddarinn bað konuna að leggjast á bakið, fara úr nærbuxunum og byrjaði að nudda á henni brjóstin og klofið. Að lokum rataði svo fingur hans inn í leggöng konunnar.

Nuddarinn bar því við að hann hefði verið að beita nýrri óhefðbundinni aðferð til að taka á verkjum í mjóbakinu. Hann hafi ætlað að nudda hana í kringum mjaðmirnar að framanverðu enda sé það svæði miðpunktur líkamans. Hann hélt því fram að aðferðin væri krefjandi og fingur hans hefði fyrir slysni runnið á olíuborinni húðinni og ratað inn í leggöng konunnar.

Það var álit sérfróðra meðdómsmanna að nuddið sem Sverrir beitti gæti ekki verið meðferð við verk í mjóbaki. Dómurinn taldi Sverri ekki hafa gefið trúverðuga skýringu á því af hverju hann ákvað að nudda konuna við kynfærasvæðið. Einnig þótti ekki trúverðugt að reyndur nuddari „missti" fingur inn í leggöng þess sem hann nuddar. Sverrir var því fundinn sekur um nauðgun í skilningi almennra hegningarlaga.

Eftir að nuddtímanum lauk var konan mjög miður sín og greindi sambýlismanni sínum og vinkonu frá atvikunum. Hún brotnaði saman og leitaði í kjölfarið til sálfræðings sem staðfesti að hún hefði orðið fyrir miklu áfalli í nuddtímanum, en það renndi stoðum undir frásögn konunnar.