Lýðsskrum að kenna vondu vinstri stjórninni um stoppið

Katrín Júlíusdóttir, fyrrverandi iðnaðarráðherra, sakaði núverandi stjórnarflokka um lýðsskrum þegar þeir héldu því fram á síðasta kjörtímabili að „vonda vinstri stjórnin“ hefði staðið í vegi álvers í Helguvík og spurði hvernig nýrri ríkisstjórn hefði tekist að klúðra málinu á aðeins sex mánuðum.

Ráðherrar úr þáverandi stjórn Sjálfstæðisflokks og Samfylkingar voru í hópi tíumenninganna sem tóku fyrstu skóflustunguna þann 6. júní árið 2008 og Ragnar Guðmundsson, forstjóri Norðuráls, var sama dag spurður hvaðan orkan ætti að koma: Búið er að ganga frá samningum við Orkuveitu Reykjavíkur og Hitaveitu Suðurnesja, var svarið, og taldi óhætt að hefjast handa, enda gerði Orkuveitan ráð fyrir að stækka Hellisheiðarvirkjun og byggja virkjun í Hverahlíð. „Þannig að það eiga að vera nægilegir möguleikar þar.”

Annað hefur komið á daginn. Í Helguvík er allt stopp og ummæli sem í síðustu viku voru höfð eftir Michael Bless, forstjóra móðurfélags Norðuráls, benda til að hann sé svartsýnn á framhaldið þar sem ekki hafi tekist að semja um orkuna.

Á Alþingi í dag rifjaði fyrrverandi iðnaðarráðherra upp að núverandi stjórnarflokkar hafi iðulega kennt vinstristjórninni um að ekkert gengi og beindi orðum að núverandi ráðherra, Ragnheiði Elínu Árnadóttur.

„Eitt af því fyrsta sem hún segir þegar hún kemur í stól ráðherra er að hún ætli að ryðja úr vegi öllum hindrunum og ætli að tryggja að þetta verkefni verði að veruleika. Sex mánuðum síðar: Bingó, búið, bless,“ sagði Katrín.

„Þess vegna er eðlilegt að við spyrjum hvernig þessari ríkisstjórn tókst að klúðra málinu á sex mánuðum. Það lifði þó áfram í þau fjögur ár sem vonda vinstri stjórnin var hér. Það er greinilega ekkert sem hæstvirtur ráðherra gat gert þannig að gjálfrið á síðasta kjörtímabili var orðin tóm og lýðskrum,“ sagði Katrín.

„Það er ekki búið að slá þetta verkefni af þannig að því sé haldið til haga,“ svaraði Ragnheiður Elín og sagði vinstri stjórnina víst hafa lagt hindranir.

„Þær hindranir sem voru í tíð seinustu ríkisstjórnar voru á þann veg að ekki var pólitískur stuðningur við þetta verkefni. Það liggur í augum upp og hefur verið öllum ljóst,“ sagði ráðherrann.