Smábátar moka upp makríl en róðurinn þyngist hjá útgerðum

Smábátasjómenn hafa mokað upp makríl síðustu daga við suðvesturhorn landsins. Makríllinn hefur vaðið um allan sjó og kraumandi flekki má sjá skammt undan landi. Frá þessu er greint á vef Víkurfrétta í dag.

Bátarnir sem um ræðir eru svokallaðir krókaaflamarksbátar. Þeir þurfa ekki kvóta til veiðanna en hafa aðeins veiðileyfi út ágúst. Afli á hvern bát í Faxaflóasvæðinu nemur tugum tonna síðan um helgina.

Sjómönnum finnst miður að þurfa að hætta veiðinum nú þegar sjórinn kraumar af makríl. Þeir benda einnig á að makríllinn sé að ræna aðrar fisktegundir fæðu sinni og honum þurfi að halda í skefjum.

Á sama tíma er kvóti stóru útgerðanna að klárast. HB Grandi á óveidd um 2.000 tonn af makríl og gert ráð fyrir að þau verði veidd eftir nokkra daga. Hjá skipum HB Granda varð veiðin erfiðari upp úr síðustu helgi, öfugt við það sem smábátasjómennirnir höfðu að segja. Með töluverðri fyrirhöfn var samt hægt að ná þokkalegum afla.

Hjá HB Granda munu menn snúa sér að síldveiðum fyrir alvöru þegar makrílkvótinn klárast.